АҞӘА, жьҭаара 6 — Sputnik. 2015 шықәса акурорттә сезон иалагӡаны Ахылаԥшра-аушьҭратә ҭыԥ "Ԥсоу" ала имҩасыз ауааԥсыра рхыԥхьаӡара рекордтәуп ҳәа иԥхьаӡоуп. Ари аамҭа иалагӡаны араҟа имҩасит 5,5 миллион-ҩык ауаа ҳәа аанацҳауеит Урыстәыла Афедералтә шәарҭадаратә маҵзура Краснодартәи атәылаҿацә аҟны Аусбарҭа.
Иахьатәи аамҭазы Урыстәылантәи Аԥсныҟа аиасра ауеит Шәача иҟоу ганрацәалатәи автомабилтә-аиасырҭатә пункт "Адлер" ахысрала.
"2015 шықәса акурорттә сезон иалагӡаны аурыс-аԥсуа ҳәааҟны, Ахылаԥшра-аушьҭратә ҭыԥ "Ԥсоу" ала имҩасыз ауааԥсыра рхыԥхьаӡара рекордтәуп ҳәа иԥхьаӡоуп. Ари аамҭа иалагӡаны араҟа имҩасит 5,5 миллион-ҩык ауаа. Ари ахыԥхьаӡара ҩышықәса раԥхьа иадкылан уахәаԥшуазар миллионҩык рыла еиҳауп. Усҟангьы аҳәаахьчаҩцәа аҳәаа иахысыз ауаа рхыԥхьаӡара акыр иҳаракуп ҳәа иазырыԥхьаӡон", — ҳәа аанацҳауеит Урыстәыла Афедералтә шәарҭадаратә маҵзура Краснодартәи атәылаҿацә аҟны Аусбарҭа.
Иазгәаҭоуп нанҳәамзазы аҳәаа ишахысыз 55 000-ҩык рҟынӡа ауааԥсыра.
"Ииасыз ашықәсқәа рзы бжьаратәла 20% рҟынӡа ари ахыԥхьаӡара еиҵаны иҟан", — аҳәоит аусбарҭа аматериалқәа рҟны.
Иара убасгьы иазгәаҭоуп лаҵарамза-цәыббрамза ианрыҵаркуаз аҳәаа иахысит ҳәа 800 000 рҟынӡа транспорттә хархәага. Уи ҵыԥх аасҭа 20% рыла еиҳауп, 2013 шықәса иадкылан уахәаԥшуазар, 45% рыла еиҳауп.
Иахьазы уахыки-ҽнаки рыла аҳәаа иахысуеит 30 000-ҩык рҟынӡа ауааԥсыреи 5 000 рҟынӡа транспорт хархәагеи. Иара убри аамҭазы азанаҭуаа агәаанагара рымоуп "Формула1" амҩаԥгараани, ноиабртәи аныҳәақәеи, "ацитрустә сезон" аани ари ахыԥхьаӡара еиҳахоит ҳәа.
