АҞӘА, абҵара 5, Sputnik, Наала Аҩӡыԥҳа. Аԥсны Жәлар Реизара адепутатцәа еицҿакрыла рыбжьы рҭиит аҵыхәтәантәи аԥхьарала "Адгьыл азы ашәахтә" азакәан апроект аԥсахрақәа алагаларазы. Аԥсахрақәа инарықәыршәаны ашәахтә рхыхуп 0,25 га иҟоу аҭыӡҭыԥшҭақәа.
Адепутатцәа еицҿакрыла рыбжьы рҭиит аҵыхәтәантәи аԥхьарала "Адгьыл азы ашәахтә" азакәан апроект аԥсахрақәа алагаларазы.
"Ари азакәан иазыԥхьагәанаҭоит ашәахтә зхырхуа адгьылқәа 16 рҟынӡа категориа. Атәыла Ахада иажәалагалала, ақыҭа уааԥсыра рзы аԥыжәарақәа мҩаԥгахоит, 0,25 га зхышәа-ҵышәа ыҟоу аҭыӡҭыԥшҭақәа ашәахтәқәа рхыххоит", — ҳәа ҳзааицҳаит атәыла Ахада Апарламент аҟны ихаҭарнак Дмитри Шамба.
Адепутат Кан Кәарҷиа иазгәеиҭеит ари аус анхацәа рыцхыраараҿы раԥхьатәи ашьаҿақәа ишреиуоу. Дмитри Шамба иҳәеит абри ауснагӡатә иахҟьаны аҳәынҭқарра 8 миллион мааҭ аԥара шацәыӡуа.
