АҞӘА, ԥхынҷкәын 29 – Sputnik, Бадраҟ Аҩӡба. Урыстәыла зҽаԥсазтәыз артист Борис Артемиев напхгара ззиуа Ростовтәи ацирк аестрада-цирктә лакә "Фунтик ашықәсҿыцазтәи ихҭысқәа" апремиера мҩаԥысраны иҟоуп Аԥснытәи аҳәынҭқарратә филармониаҟны аҩаша, ԥхынҷкәын 29 рзы.
"Ҳара ахәыҷқәа идҳарбараны ҳаҟоуп аестрада-цирктә спектакль", иҳәеит Урыстәыла зҽаԥсазтәыз артист Борис Артемиев.
Иара иазгәеиҭеит аспектакль аиҳарак иара иҵаҩцәа шракәу иалахәу.
"Аспектакль интиресуп, хаҭала ахәыҷқәа ирызкуп", — иҳәеит иара.
Артемиев иажәақәа рыла ацирк раԥхьаӡа акәны Аԥсныҟа иааит.
Ростовтәи ацирк аанаԥхьеит аԥсуа ган.
"Сҩызцәеи сареи иҳаӡбеит ашықәс ҿыц азы ахәыҷқәа аҳамҭа рзыҟаҳҵарц. Борис Артемиев ианидаагала – дақәшаҳаҭхеит", — иҳәеит Ростовтәи ацирк Аԥсныҟа аара аиҿкааҩцәа ируаӡәку Амир Цушба.
Иара иазгәеиҭеит ақәгылара Гәдоуҭатәи Акультуратә хан аҟны ишымҩаԥыргахьоу. Аиҿкааҩ иажәақәа рыла ацхыраара рырҭеит Аԥсны Акультура аминистррагьы.
