АҞӘА, ԥхынҷкәын 29 — Sputnik, Роберт Џьапуа. 2016 шықәса рзы абизнес маҷ адгылара апрограмма Аминистрцәа Реилазаара иаднакылеит ашәахьа, Аԥсны Аминистрцәа Реилазаара аилатәараҟны.
Ажәахәҟаҵаҩ, аекономика аминистр Адгәыр Арӡынба иажәақәа рыла Апрограмма анагӡаразы 300 миллион мааҭ азоужьхоит.
"Апрограмма азырхахоит ареспубликаҟны аԥыжәара змоу ахырхарҭақәа: ақыҭанхамҩа, иҟоу анаплакқәа рырҭбаара, атуристтә усхк, аҭыԥантәи аӡеи аресурсқәеи ахрархәара", — иҳәеит Арӡынба.
Иара иазгәеиҭеит абри апрограммала ахәаахәҭра адгылара арҭараны ишазыԥхьагәаҭам.
"Апрограмма анагӡараан аекономика аминистрра имҩаԥнагараны иҟоу аусқәа зегьы аартхоит. Акомиссиа иахыгахоит апрограммақәа. Уахь инаԥхьахоит адепутатцәа, аилакқәеи аусбарҭақәеи рхаҭарнакцәа",- иҳәеит аминистр.
Апрограмма анагӡара иҟанаҵо алҵшәа далацәажәо аминистр иазгәеиҭеит 60 инареиҳаны анаплакқәаеи 300 инареиҳаны аусурҭа ҭыԥқәеи иара ацхыраарала раԥҵара шазыԥхьагәаҭо.
