АҞӘА, ажьырныҳәа 27 — Sputnik, Роберт Џьапуа. Сергеи Шамба ареспубликатә партиа "Иаку Аԥсны" ахантәаҩыс далхуп. Алхра мҩаԥысит ахаша, ажьҭаара 27 рзы имҩаԥысуаз Ареспубликатә политикатә партиа "Иаку Аԥсны" VI аизара ду аҟны.
Апартиа анапхгаҩ ҿыц иқәгылараҟны еизаз ирзеиҭеиҳәеит "Иаку Аԥсны" аҿаԥхьа иқәгылоу ахықәкқәеи аусдҵақәеи ртәы, иазгәеиҭеит ареспубликаҟны ареформақәа рымҩаԥгара ахәҭаны ишыҟоу.
"Ауаажәларра рыбжьара аимадара, аицеиқәшаҳаҭра ыҟазароуп. Уи ахәҭаны иҟоуп аҩныҵҟатәии адәныҟатәии проблемақәа риааиразы. Ҳпартиа аҽазнархиоит 2017 шықәса рзы имҩаԥысраны иҟоу апарламенттә алхрақәа. Ҳара уахь анеира ҳагәҭакуп аԥсуа уаажәларра ирарҳәо змоу партиак аҳасабала", — иҳәеит Шамба.
Ахантәаҩы ихаҭыԥуаас иалхуп Владимир Василиев, Роберт Иаилиан, Даҭо Қаџьаиа.
"Иаку Аԥсны" шьаҭаркын 2004 шықәса рзы уаажәларратә-политикатә ҵысрак аҳасабала. Иара ахьӡалоуп атәыла Ахадарахьы кандидатс ҳәа дшықәгылаз Сергеи Багаԥшь.
2009 шықәса ажьырныҳәа 27 рзы иара политикатә партианы аҽеиҭанакит. Напхгара азиуан Даур Ҭарба. 2015 шықәса жьҭаарамзазы иара инапынҵақәа шьҭеиҵеит.
Сергеи Шамба диит 1951 шықәса хәажәкыра 15 рзы, Гәдоуҭа. 1997-2010шш. – Аԥсны Адәныҟатәи аусқәа рминистр. 2004-2011шш. рзы атәыла Ахада ҳәа икандидатура ықәиргылон. 2014 шықәса ԥхынҷкәынымзазы Сергеи Шамба далхуп Аԥсны Жәлар Реизарахь депутатс.
