АҞӘА, хәажәкыра 15 — Sputnik, Саид Барганџьиа. Џьелиа идгылаҩцәа Апарламент аҿаԥхьахь имааит, азинхьчаратә органқәа рыҽԥыршәоит урҭ рҽахьеизыркуа аилкааразы, иҳәеит Аԥыза-министр актәи ихаҭыԥуаҩ Шамиль Аӡынба. Уаанӡа Џьелиа иуацәа иазгәарҭахьан хәажәкыра 15 рзы Апарламент аҿаԥхьа ҳаизоит ҳәа.
Атәыла Ахада Иусбарҭа ахьчаҩцәа аус шыруц ируеит, азинхьчаратә органқәа аҭагылазаашьа аҽыԥсахра иазыхиоуп.
Еизаз рахь днеиит Аԥыза-министр актәи ихаҭыԥуаҩ Шамиль Аӡынба.
"Агәалсра ду узцәырнагоит абри аҩыза амш азы аполитикатә амбициақәа ианрылацәажәо, аҭагылазаашьа рхы ианадырхәо", — иҳәеит Аӡынба.
Асааҭ 9 инаркны Ахада Иусбарҭахь иааиуа иалагеит Аҩныҵҟатәи аусқәа рминистр Леонид Ӡаԥшьбеи атәыла анапхгареи рыдгылаҩцәа.
"Арахь ауаа ааиит иахьатәи анапхгара ишрыдгыло аадырԥшырц, ргәы ишрыҵанаҳәаз аиԥш", — иҳәеит Аӡынба.
Еизаз рахь днеиит адепутат Кан Кәарҷиа. Иара еизаз иреиҳәеит еимымпырц, Џьелиа идгылаҩцәа ааир ирҳәо иазыӡырҩырц.
Завтомашьына ААИ (ГАИ) аусзуҩцәа аехсыз, СИЗО "Дранда" уаанӡатәи аиҳабы Руслан Џьелиа иуацәеи иҭынхацәеи ААР(МВД) ахыбра аҿаԥхьа еизеит ахаша, хәажәкыра 9 рзы. Дҵаны иқәдыргылоит Аԥсны Аҩныҵҟатәи аусқәа рминистр Леонид Ӡаԥшьба иусура дамхызааит ҳәа
Уаанӡа аҭагылазаашьа аҭыԥ ақәҵаразы Руслан Џьелиа иуацәа рхаҭарнакцәеи аминистр Леонид Ӡаԥшьбеи еиԥылеит. Аминистр иажәақәа рыла иара адҵа ҟаимҵаӡеит Џьелиа иавтомашьына иаехсырц азы.
Ззин ҟаҵамыз амитинг аганахьала Аԥсны Апрокуратура Хада аусҭҵааратә усбарҭа агә́аҭарақәа мҩаԥнагоит. Урҭ иҟарҵо алкаақәа инарықәыршәаны ААР(МВД) амаҵзуратә хаҿқәеи Руслан Џьелиеи румҭа ахәшьара аҭахоит.
