АҞӘА, лаҵарамза 10 – Sputnik, Наала Аҩӡыԥҳа. Амаланыҟәатә еиԥхныҩлара "Аиааираз иҭабуп" Аҟәа-Гәылрыԥшь-Аҟәа мҩаԥысит лаҵарамзаа жәба рзы.
Аԥсны иҟоу Россатрудничество ахаҭарнак Евгени Павлов иажәақәа рыла ари аиԥхныҩлара хынтәуп Аԥсны имҩаԥысуеижьҭеи.
"Аҵыхәтәантәи ашықәсқәа рзы ирацәаҩхеит амаланыҟәа ҳаҭыр ақәызҵо рхыԥхьаӡара. Аспорт еснагь ауаҩытәыҩса иҟазшьа бзиақәа раарԥшра иацхрааҩуп, уи азы аҭагылазаашьақәа изаԥнаҵоит", — иҳәеит иара.
Аибашьра Дуӡӡа Аиааирамш иазку акциа "Аиааираз иҭабуп" алахәылацәа иреиҵбу Никита Ақаҩба аа-шықәса ихыҵуан.
Зегь иреиҳабыз Михаил, 56 шықәса ихыҵуан.
"Аиааира амш иазку ари аҩыза акциа гәахәара дула схы аласырхәит. Ари амш иацтәи аиааиреиԥш уаҵәтәи аиааирагьы иамшны иҟоуп", — иҳәеит иара.
Маланыҟәала аиԥхныҩлара акциа "Аиааираз иҭабуп" еиҿкаан Россатрудничество ахаҭарнакра аԥшьгарала, Аԥсны иҟоу Урыстәыла Ацҳаражәҳәарҭеи, Аҟәеи Гәылрыԥшь араиони Рхадарақәеи рыцхраарала. Акциа алахәылацәа ашәҭшьыҵәрақәа шьҭарҵеит Гәылрыԥшь иҟоу аиашьаратә ԥсыжырҭаҿи Аҟәа, идырым асолдаҭ Ибаҟа аҿаԥхьеи.
