АҞӘА, ԥхынгәы 13 – Sputnik, Бадри Есиава. Аџьармыкьа аҟны ирҭиуа ашәыри ауҭраҭыхи рхаҭабзиара ахьгәарҭо афитолабораториа хымз ҵуеит аус амуеижьҭеи, иҳәеит Ақыҭанхамҩа аминистр Ҭимур Ешба. Уи зыхҟьаз алабораториа ахьыҩноу ахыбра арендатә хәыԥса Ақыҭанхамҩа аминистрра ашәара ахьалымшо ауп иҳәеит иара.
"Арендатә хәыԥса мызкахьы 30 нызқьмааҭ артәоит. Уи аҩыза аԥара аминистрра иамам. Абри ауп афитолабораториа аус ахьамуа мзызны иамоу", — иҳәеит Ешба.
Иара иажәақәа рыла уаанӡа аминистррахь изныкымкәа ашшыԥхьыӡқәа неихьан афитолабораториаҟны ашәырқәеи ауҭраҭыхқәеи рхаҭабзиара анализ азуразы аԥара рацәаны иргоит ҳәа. Уи апрокурортә гәаҭарахь икылнагеит, адиректоргьы дамххеит.
"Анализк 20 мааҭ иаԥсоуп аха ҳара ҳахь шшра инеиз иазгәарҭон уи акырџьара еиҳаны аԥара шыргоз азы", — иҳәеит аминистр.
Ешба иҳәеит аџьармыкьа афитолабораториа анапхгаҩ ҿыцс Роза Ҭаниаԥҳа лаҭара шиӡбаз.
Афитолабораториа аиҳаб ҿыц Роза Ҭаниаԥҳа ҳкорреспондент данлыҿцәажәоз илҳәеит алабораториа иахәҭоу мыругала ишеиқәыршәо, иарбанызаалак анализ аҟаҵара ишазыхио.
Ақыҭанхамҩа аминистр иазгәеиҭеит иаарласны аџьармыкьа анапхгареи Аҳәынҭстандарти арендатә хәыԥсазы ишеицәажәалак афитолабораториа аусура шхацнаркуа. Урҭ зеиламцәажәар афиталобараториа Аҳәынҭстандарт аремонт зызнауз ахыбраҟынтәи аветеринартә лабораториа ахыбрахь ииасуеит ҳәа.
