АҞӘА, ԥхынгәы 13 – Sputnik, Бадри Есиава. Апассаџьырцәа рымҩаԥгаразы алицензиа ҿҳәарадахои, ахәԥса жәанызқьмааҭ артәоит, иҳәеит Аԥсны аенергетикеи атранспорти рзы аусбарҭа аиҳабы Зураб Ҳаџьымба.
"Ҳазҭоу ашықәс рашәарамзазы иҳадаҳкылеит аӡбра ҿыц апассаџьырцәа рымҩангаразы азин ҷыда автотранспорт арныҟәаҩ ишиоушаз. Иагьышьақәҳаргылеит апассаџьырцәа рымҩаԥгаразы алицензиа ҿҳәарадахои, ахәԥса жәанызқьмааҭ артәоит ҳәа. Уаанӡа иара хнызқьмааҭ иаԥсан, аха аҿҳәара хышықәса ҳәа ишьақәыргылан", — иҳәеит Аԥсны аенергетикеи атранспорти рзы аусбарҭа аиҳабы Зураб Ҳаџьымба.
Иара иазгәеиҭеит ари ахәԥса иара азин ҷыда ахаҭа акәымкәа аҳәынҭқарратә баџь шакәу, аха уи шушәаз азы ашәҟәы ада азин ҷыда шумоуа.
Ақәҵара амчра аиуеит 2016 шықәса ԥхынгәы 24 инаркны.
"Ақәҵара ыҟоуп аха абланк ҿыцқәа азырхиам. Убри азы урҭ рхиахаанӡа ажәытә бланкқәа раҳҭалоит амашьынарныҟәаҩцәа. Абланкқәа шыхиахалак урҭ ҳаԥсахуеит. Абланкқәа шыхиахаз атәы АИХ (СМИ) ала ирылаҳҳәоит", — иҳәеит иара.
Алицензиаҟаҵара аҟәша аиҳабы Лаура Циминтиаԥҳа лажәақәа рыла ари аус 2014 шықәса мшаԥымза 1 азы Аекономика аминистрра Аԥсны аенергетикеи атранспорти рзы аусбарҭа анапы ианнаҵеит. Абри аамҭа иалагӡаны ирыҭоуп 433 лицензиа.
"Азин ыҟоуп лицензиак ганы уахь автомашьынақәа рышәҟәбӷьыцқәа ацуҵар. Иаҳҳәап: аекскурсиамҩаԥгаратә фирма азин амоуп лицензиак ганы 40 машьына аусура иҭрыжьыр", — лҳәеит Циминтиаԥҳа.
Уи адагьы дарбанызаалак арныҟәаҩ атранспорт атехникатә ҭагылазаашьазы ашәҟәы имазароуп. Атранспорт адәахьтәи аԥшреи аманшәалареи аусбарҭа аусзуҩцәа ахәшьара арҭоит.
