АҞӘА, нанҳәа 2 — Sputnik. Фазиль Искандер аҵыхәтәантәи имҩахь днаскьаргеит иҩызцәа, иуацәа, ирҿиара абзиабаҩцәа.
Ашәҟәыҩҩы абзиараз ҳәа иарҳәарц арахь иааиит: Урыстәыла акультура аминистр Владимир Медински, Урыстәыла иҟоу Иран Ацҳаражәҳәаҩ Мехди Санаи, Рауль Ҳаџьымба зхадараҿы дыҟоу Аԥснытәи аделегациа, Евгени Евтушенко, Евгени Попов, Владимир Вишневски, Лев Рубинштеин, Анна Гербер, Мариетта Чудакова, Александр Филиппенко, Виктор Шендерович, Андреи Максимов, Анатоли Курчаткин, Владимир Захаров, Алексеи Шапошников уҳәа жәпаҩык.
Фазиль Абдул-иԥа Искандер диит хәажәкыра 6 1929 шықәса рзы, Аҟәа. 1954 шықәса рзы далгеит А.М. Горки ихьӡ зху Алитературатә институт.
Ҩышықәса рышьҭахь дхынҳәуеит Аԥсныҟа, Аҳәынҭшәҟәҭыжьырҭа аԥсуа ҟәша аредакторс.
1956 инаркны иҩымҭақәа ркьыԥхьуан ажурналқәа: "Смена", "Неделя", "Костер", "Сельская молодежь" уҳәа рыҟны. Раԥхьатәи иажәеинраалақәа реизга "Горные тропы" ҭыҵит 1957 шықәса рзы Аҟәа. 1966 шықәса рзы ажурнал "Новый мир" аҟны икьыԥхьын аповест — "Созвездие Козлотура".
Искандер ирҿиамҭақәа ирылукаартә иҟоуп "Сандро из Чегема" (1973-1988, автобиографиатә ҩымҭа).
Искандер иажәабжьқәеи иповестқәеи еиҭагоуп шамахамзар европатәи абызшәақәа зегьы рахь.
Искандер иҩымҭақәа ирылхны иҭыхын абарҭ афильмқәа: "Воры в законе", "Пиры Валтасара, или Ночь со Сталиным", "Маленький гигант большого секса".
Фазиль Искандер ианашьан аорденқәа "За заслуги перед Отечеством" III (1999), II (2004), IV (2009) аҩаӡарақәа, "Ахьӡ-аԥша" аорден I аҩаӡара, Аԥсны (2002).
Ашәҟәыҩҩы анышә дамадахоит акомпозитор Андреи Ешпаии уаанӡатәи аминистр, асенатор Александр Починоки рывара.
