АҞӘА, нанҳәа 3 — Sputnik, Анжелика Бениаԥҳа. Елена Анқәабԥҳаи (сопрано) Баҭал Сақаниеи (тенор) италиатәи ақалақь Пезаро аҟны нанҳәа 7 рзы имҩаԥысуа афестиваль аҟны аконцерт рхы аладырхәоит. Афестиваль еизнагоит еиуеиԥшым атәылақәа рҟынтәи аклассикатә музыка абзиабаҩцәа. Уи иалнаршоит аԥсуа артистцәа рылшарақәа раарԥшра. Абри атәы ҳзааицҳаит Баҭал Сақаниа.
"Сынтәатәи аԥхынраз сара сзы акрызҵазкуа ахҭысқәа ҩба ҟалоит. Италиа аҵара анысҵоз аамҭа инаркны сара сақәгәыӷуан мышкызны Лучано Павароттии Хуан Диего Флореси злахәыз аоператә фестиваль салахәхап ҳәа. Иахьа, Мауро Мурджиа ицхыраарала сареи Елена Анқәабԥҳаи афестиваль ахь ҳнаиԥхьеит Академиа "Россиниата" адиректор Франческа Матачена", – иҳәеит Сақаниа.
Баҭал Сақаниа иара убасгьы афестиваль "Хьыбла Гьерзмааԥҳа шәаалыԥхьоит…" аҳәаақәа ирҭагӡаны аопера "Медеиа" далахәхоит.
Пезаро аконцерт мҩаԥысуеит "Оперный фестиваль имени Джоаккино Россини" аҳәаақәа ирҭагӡаны. Иара мҩаԥысуеит 1980 шықәса раахыс. Аԥснытәи ашәаҳәаҩцәа аԥсышәала, италиа бызшәала, урысшәала инарыгӡоит акомпозициақәа.
