АҞӘА, нанҳәа 3 — Sputnik, Рада Ажьиԥҳа. Гагра араион иахьаҵанакуа иҟалаз амҩатә машәыр аҟны ааха роуит 18-ҩык ауааԥсыра, урҭ рҟынтәи хәҩык хәыҷқәоуп, аӡәы дҭахеит, ҳәа адырра ҟаиҵеит АҶА апресс-маҵзура аиҳабы Мизан Ломиа.
"Аубыхцәа рыхьӡ зху амҩадуаҟны еинҟьеит автобус маҷ "Мерседеси" автомашьына "Ниссани". Амашәыр иахҟьаны ааха роуит 18-ҩык ауааԥсыра, урҭ рҟынтәи хәҩык хәыҷқәоуп, дҭахеит 1954 шықәса рзы ииз Виктор Гусько, Омск ақалақьуаҩ", — иҳәеит Ломиа.
Ааха зауз Гагра араионтә хәышәтәырҭахь инагоуп.
"Аҭаҩратә шәҟәы ахирургиатә ҟәшаҟны иҟоуп. Макьаназы аҭаҩрақәа мҩаԥыргоит. Ҩыџьа аӡӷабцәа абаҩԥҵәа рылоуп, ԥҳәыск лҭагылазаашьа хьанҭоуп", — лҳәеит адкыларҭа амедицинатә еҳәшьа Лиудмила Бадалова.
Амашәыр ҟалеит ҳәа АҶА ахь аҭел иасит ашьыжь, асааҭ 10:03 рзы.
