АҞӘА, нанҳәа 4 – Sputnik, Бадраҟ Аҩӡба. Нанҳәа 3 аухатәи амшцәгьа иахҟьаны ауаажәларратә транспорт амаршрут еиҭакуп, лҳәеит Аҟәа ақалақь Ахадара акоммуналтә Усбарҭа аиҳабы Елена Атепина.
"Атроллеибусқәа рмаршрутқәа рыла автобусқәа ҳашьҭит. Лакоба имҩа аӡы ахьану инамаданы автобусқәа Аҭынчра апроспект ала иныҟәалоит. Уахьынтәи Араион ҿыц ахь ицоит", — лҳәеит лара.
Аҳҭнықалақь амҩақәа: Черкесскаиа, Дагестанскаиа абгарақәа рымоуп. Уажәазы АҶА, акоммуналтә маҵзурақәа зегьы рымч еибыҭаны аус руеит. Елена Атепина лажәақәа рыла аӡиасқәа Гариквара, Сухумка, Адзапш, Басла хыҵит.
Ақалақь агәҭоуп еиҳарак ааха зауз. Аԥша ӷәӷәа зҵаз ақәаршҩы аҵлақәа канажьит иара убасгьы афымцатә цәаҳәақәа ԥыҵәҵәан.
Ақәаршҩы иахҟьаны аӡиасқәа жәпакы рыҭра иҭыҵит. Иҟоуп амҩақәа ахьҿыӡәӡәаау. Ешыра ақыҭа иахьаҵанакуа ацентртә трассаҟны ахаҳә леиит. Уи автомашьынақәа рныҟәара аруадаҩит уажәазы арыцқьаратә усурақәа ирҿуп.
