ГАГРА, нанҳәамза 19 — Sputnik, Саида Жьиԥҳа. Гагра ақалақь "Репруа" аҩбатәи ахаларҭаҟны ишьақәыргылоуп аӡыҭага ҿыц. Уи иалнаршоит, ақалақь ажәытә хәҭа инагӡаны ӡыла аиқәыршәара.
Ԥхынгәымзазы, араҟа ишьақәыргылаз аӡыҭага аиларҭәа ахьажәыз инамаданы, уи аусура аанкылан. Мышқәакгьы ақалақь ажәытә хәҭа ӡыда иҟан.
Аӡыҭгага ҿыц аархәаанӡа, аӡыканал аспециалистцәа, араҟа ишьақәдыргылеит Пицундатәи акурорттә Еилазаараҟнытә аамҭала иааргаз аӡыҭага.
"Миллионки ҩышә нызқь мааҭи ҳәа, Гагра араион Ахадара рыцхыраарала, Урыстәылантәи иаахәаны иааҳгеит аӡыҭгага агрегат ҿыц. Уи амчхара ҳаракуп, насгьы иахьатәи ҳаамҭа иашьашәалоит аҟнытә, ақалақь ажәытә хәҭаҟны аӡы аганахь ала еиԥҟьара ҟамлар ахәҭоуп", — иҳәеит Гагратәи аӡыканал аиҳабы Иури Цулукиа.
Аҭыԥантәи аспециалистцәа ари агрегат ҩымш ашьақәыргылара иаҿын. Иахьа уи ахархәарахь инашьҭхоит.
