АҞӘА, цәыббра 1 — Sputnik. Аԥсны Аҳәынҭқарра Ахада Рауль Ҳаџьымба зхадараҟны дыҟоу Аԥснытәи аделегациа Ҟабарда-Балкариатәи ареспублика иаҭааит аԥшьаша, цәыббра 1 азы. Абри атәы аанацҳауеит атәыла Ахада иофициалтә саит.
Аԥсуа делегациа ашәҭшьыҵәрақәа шьҭарҵеит Нальчик ақалақь аҟны игылоу Аԥсны ахақәиҭреи ахьыԥшымреи зхы рықәызҵаз рбаҟа амҵан.
Ацеремониа иалахәын Ҟабарда-Балкариа аиҳабыра рхантәаҩ ихаҭыԥуаҩ Владимир Битоков, Аԥсны Аџьынџьтәылатә еибашьраан хатәгәаԥхарала иааны еибашьуаз.
Аусутә визит аҳәаақәа ирҭагӡаны имҩаԥысит Аԥсны Ахада Рауль Ҳаџьымбеи Ҟабарда-Балкариа Ахада Иури Кокови реиԥылара. Аиԥылараан ирылацәажәан ҩ-ганктәи аизыҟазаашьақәа еиуеиԥшым распектқәа: аекономикатә, акультуратә, агуманитартә уҳәа аусеицурақәа.
Аԥснытәи аделегациа аусутә визит хацыркын Ҟарачы-Черқьессктәи ареспубликаҟынтәи. Уаҟа имҩаԥган хатәгәаԥхаралатәи аибашьцәа рбаҟа аартра ацеремониа.
