АҞӘА, цәыббра 23 – Sputnik, Роберт Џьапуа. Амазареи ахатәтәреи рзы Аҳәынҭқарратә еилакы аҟны ирҭахуп арендаторцәа аҳәынҭқарратә мазара еиҳа хра аманы рхы иадырхәаларц, иҳәеит аусбарҭа анапхгаҩы Вахтанг Ԥиԥиа Sputnik аинтервиу анеиҭоз. Уи аҽазныкгьы аҳәынҭқарра еиҭахәаԥшраны иҟоуп иҳәеит иара.
"Ҳара уажәы иҭаҳҵаауеит иахьазы аҳәынҭқарратә хатәраҿы иҟоу анаплакқәа зегьы. Ахәшьара раҳҭоит урҭ хра рыманы аус руоу ирымуоу, аҳәынҭқарра дара рҟынтәи афеида аиуоу иамиуоу", — иҳәеит Ԥиԥиа.
Аҳәынҭеилакы анапхгаҩы иазгәеиҭеит аусутә акыр ишырацәоу, амҩаԥгарагьы шхацырку.
"Уаанӡагьы абри аҩыза ауснагӡатәқәа мҩаԥыргалон, аха уажәы ҳара аҽа знеишьак ала ҳазнеиуеит. Сгәы иаанагоит иаарласны еилаҳкаап ҳәа иарбан обиектқәоу хра зманы аҳәынҭмазара зхы иазырхәо", азгәеиҭеит Вахтанг Ԥиԥиа.
Вахтанг Ԥиԥиа иазгәеиҭеит зхадараҿы дыҟоу аусбарҭа аинтерес аманы ишыҟоу арендатор аҳәынҭмазара феидала ихы иаирхәоу иаимырхәоу аилкааразы.
Арендатор ахашәала бзиа иоуазар, аҳәынҭқаррагьы ахашәала аиуеит ашәахтәқәа рыҳасабала, арендахәԥса аҳасабала уҳәа ирацәаны.
Уаанӡа Sputnik аинтервиу аҭо Вахтанг Ԥиԥиа иҳәахьан Аԥыза-министр "уаанӡатәи аилаӡарақәа еиҭарыхәаԥштәуп" ҳәа ииҳәаз дшадгыло.
