АҞӘА, жьҭаара 11 – Sputnik, Бадраҟ Аҩӡба. Аҳәынҭқарра аулафахәи атәанчахәи рганахьала уалԥса адны иҟам, иҳәеит Рауль Ҳаџьымба 2016 шықәсазтәи абиуџьет анагӡашьеи 2017 шықәсатәи абиуџьет аиҿкаашьеи ирызкыз аилацәажәараҟны.
"Џьоукы-џьоукы ишырҳәо еиԥш аҭагылазаашьа шәарҭаны иҟам, миллионлагьы уал аҳәынҭқарра иақәханы иҟам. Аҽазныкгьы исҭахуп агәра шәсыргарц ҳхыдҵақәа зегьы хәыҷы-хәыҷла рынагӡара ҳшаҿу азы", — иҳәеит атәыла Ахада.
"Аӡәгьы иҳәом иҟоу шыҟоу иҟаз, абиуџьетгьы шыҟоу иҟаз ҳәа. Ҳара иҳамоу ахәшьарақәа иаадырԥшуеит атәылаҟны аҭагылазаашьа ишаҳҭаху еиԥш иласымзаргьы, аҽшаԥсахуа. Агәра згоит ихроу алҵшәақәа ҳашрызкылсуа", — иҳәеит Ҳаџьымба.
Аԥсны Аԥыза-министр Беслан Барцыц иазгәеиҭеит 2017 шықәсазтәи абиуџьет апроект аус адулара ишаҿу.
"2017 шықәсазтәи Аиндикативтә план шьақәырӷәӷәан аҵыхәтәантәи аминистрцәа реилатәараҟны. Ишьақәыргылоу аҿҳәарала адокумент нашьҭхоит атәыла Ахада иахь", — иҳәеит иара.
