АҞӘА, аԥшьаша 29— Sputnik, Бадри Есиава. Аԥшьаша, ԥхынҷкәын 29 рзы имҩаԥысыз Аԥсны жәлар Реизара асессиаҟны Аԥсни Приднестровиеи рыбжьара визада аиҭанеиааиразы аиқәшаҳаҭра аратификациа азыруит.
Апарламент аҟны атәыла Ахада ихаҭарныкс иҟоу Дмитри Шамба иажәақәа рыла ари аиқәшаҳаҭра аҳәынҭқаррақәа рыҩба рыбжьара аиҩызаратәи, аекономикатәи, акультуратәи еизыҟазаашьақәа рырҿиаразы ихәарҭа духоит.
"Аԥсны Аҳәынҭқарреи Приднестровиатәи Молдавиатәи Ареспубликеи рыбжьара визада аиҭанеиааиразы Аиқәшаҳаҭра анапы аҵаҩын 2016 шықәса ԥхынҷкәын 25 рзы", — иҳәеит Шамба.
Апарламент адепутатцәа еицҿакрыла аиқәшаҳаҭра аратификациа арҭеит. Аԥсны Аҳәынҭқарра азакәан "Аԥсны Аҳәынҭқарра алалареи Аԥсны Аҳәынҭқарра алҵреи рзы аԥҟарақәа" инақәыршәаны, визада аиҭанеиааиразы аҳәынҭқаррабжьаратә еиқәшаҳаҭра ахьыбжьам атәылақәа (Урыстәыла, Никарагуа, Тувалу, Аахыҵ Уаԥстәыла рыда) ртәылауаа рзы авизатә режим шьақәыргылоуп.
