АҞӘА, жәабран 23 — Sputnik, Владимир Бегунов. Аԥсны калифорниатәи атрипс зынӡаскгьы иҟам, ҳәа ҳалҳәеит Аԥсны аҵиаақәа рзы аҳәынҭқарратә карантинтә инспекциа алабараториа аиҳабы Маиа Шьынқәырԥҳа. Лара лажәақәа рыла алабараториа аус ауеижьҭеи акырҵуеит. Абарҭ аамҭақәа рзы зныкгьы иҳамбац зыӡбахә ҳәоу атрипс, лҳәеит лара.
"Трипс – ҩ-миллиметрак иҟоу маҵа-хкуп. Еиуеиԥшым ахкқәа ыҟоуп. Иҟоуп Аԥсны иуԥылоугьы, аха ҷыдала зыӡбахә ҳәаз атрипс Аԥсны иахьаҵанакуа иҳамбацт", — лҳәеит лара.
Россельхоз иҟанаҵаз аҳәамҭа раԥхьатәиуп.
"Ҳара ҳхаҭа иаабар ҳҭахуп зыӡбахә ҳәоу атрипс ахкы. Аҳәааҟны заалыҵ абри аҩыза атрипс адырбалаз рахь аҳәара ҟаҳҵоит иҳадҵааларц", — лҳәеит лара.
Амаҵа аԥсадгьыл Аҩадатәи Америка ауп.
