Sputnik, Анжелика Бениаԥҳа.
Ражьден Гәымба ихьӡ зху Аԥснытәи аҳәынҭқарратә филармониа кәапеишәа иҭәын. Арахь иааит Лера лықәгылара збарц зҭахыз зегьы. Апроект афинал дырбара иалагаанӡа, асааҭ 19:00 рзы аҭыԥантәи акәашаратәи ашәаҳәаратәи аколлективқәа рконцерт мҩаԥысит.
Апроект афинал акәзар, асааҭ 20:00 рзы иалагеит. Зегь азыԥшын Лера лцәырҵра.
НТВ апроект ҿыц "Ты супер!" аҭаацәа ирылхәдоу ахәыҷқәа рҽаарԥшраз алшара рнаҭоит. Иара иалахәын ахәыҷқәа рыҩнқәа рҟны ирааӡо, ашкол-интернатқәа ирҭоу, ус аҭаацәарақәа рахь ааӡара ирго ахәыҷқәа. 7 шықәса инаркны 18 шықәса рҟынӡа зхыҵуа апрофессионалтә жиурии миллионҩыла ателехәаԥшцәеи рҿаԥхьа рҟазара аадырԥшуан аҵыхәтәантәи аамҭақәа рзы.
Афинал аҟынӡа инеиз 20-ҩык афиналистцәа ирылкаан иреиӷьӡақәаз 10 –ҩык.
Ахәаԥшцәа Лера лықәгылара акраамҭа иазыԥшын. Лара аҵыхәтәантәи лакәны дықәгылеит. Игорь Крутои лареи анеиццәырҵ азал аҟны излагаз анапенҟьабжьқәа Лера лыбжьы рыҵадырӡуан.
Уажәазы лара иналыгӡон Ани Лорак лашәа "Снится сон".
Аконкурс "Ты супер!" аҿы аиааира згаз шьақәдыргылон ахәаԥшыҩцәа, смс-қәа рыла.
Урҭ инарықәыршәаны актәи аҭыԥ аанылкылеит Валериа Адлеиаԥҳа, аҩбатәи— Витали Толочкин, ахԥатәи — Анастасиа Симоганова, аԥшьбатәи— Карина Исмаилова, ахәбатәи — Надежда Шебанова, афбатәи — Кирилл Есин,
абыжьбатәи — Евгени Боицов, аабатәи — Кристина Ашмарина, ажәбатәи — Дариа Чернова, ажәабатәи— Софиа Волошаненко. " Валериа зегь ҳлырҵәыуеит. Макьанагьы агәра сызгом аиааира Валериа илгеит ҳәа", — лҳәеит ахәаԥшҩы Шьазина Жьиԥҳа.
Апроект аҟны иаиааиз лаҳасабала Лера еиҭаналыгӡеит Лара Фабиан лашәа "Adagio".
Кремльтәи ахан асценаҟны ашәаҳәаҩцәа қәыԥшцәа ирыцықәгылан: Виктор Дробыш, Иолка, Слава, Стас Пиеха, Маргарита Суханкина, Сосо Павлиашвили, Игорь Крутои, Константин Мелаӡе, Вера Брежнева, Анне Вески, Тамара Гвердцители, Роза Рымбаева уҳәа егьырҭгьы.
