АҞӘА, рашәарамза 1— Sputnik, Бадри Есиава. Аԥсны Аекономика аминистрра аделегациа алахәуп Петербург имҩаԥысуа жәларбжьаратәи аекономикатә форум. Афорум мҩаԥысуеит рашәарамза 1-3 рзы. Аԥсуа делегациа гәҭакны иамоуп афорум аҳәаақәа ирҭагӡаны аиԥыларақәа рымҩаԥгара, ҳәа радио Sputnik Аԥсны иазааицҳаит Аекономика аминистр Адгәыр Арӡынба.
"Аԥснытәи аделегациа иалахәуп: адәныҟатәи аусқәа рминистр Даур Ақаҩба, аинвестициатә маҵзура адиректор Алмас Ҭаниа, Аекономика аминистрра апресс-маӡаныҟәгаҩ Георги Берзениа, сара. Ҳара иазыԥхьагәаҳҭоит Урыстәылатәи ҳколлегацәа рԥылара", — иҳәеит иара.
Афорум мҩаԥысуанаҵы Аԥснытәи аделегациа алахәхоит апленартә еилатәара, астол гьежьқәа, аекономикатә зҵаарақәа хылаԥшра рызҭо амчратә органқәа рԥылара, абизнес-уаажәларра рԥылара.
Петербургтәи жәларбжьаратәи афорум мҩаԥысуеит 1997 шықәса раахыс. Арҭ аамҭақәа рыла афорум аекономикатә зҵаарақәа ахьырыӡбоу адунеизегьтәи ҭыԥны иҟалеит.
