АҞӘА, рашәарамза 2 – Sputnik, Владимир Бегунов. Аԥсны Атранспорт азы аҳәынҭқарратә усбарҭеи Лугансктәи жәлар рреспублика аинфраструктуреи атранспорти рминистрреи аусеицуразы аиқәышаҳаҭра рыбжьарҵеит. Аиқәышаҳаҭра иазыԥхьагәанаҭоит Аҟәеи Лугански рыбжьара автобустә еимадара рыбжьаҵара.
Аимадара ахацыркра арыцхә макьаназы иныҭкааны ишьақәыргылам, уи азы хаз иго адокумент анапы аҵаҩхоит, иҳәеит Аԥсны Атранспорт азы аҳәынҭқарратә усбарҭа аиҳабы Робесҭан Габлиа.
Габлиа иажәақәа рыла аиқәшаҳаҭра рнапы аҵарҩит аминистрцәа рыдагьы аиҿкаарақәа "Аԥсныавтовокзал", "Луганское региональное управление автобусных станций".
"Иаарласны Лугансктәи жәлар рреспубликахь ацара ҳагәҭакуп. Уаанӡа "Аԥсныавтовокзал"-и "Луганское региональное управление автобусных станций" ареис амаршрут аус адырулараны иҟоуп. Иахәҭоу адокументгьы аҭыԥ аҟны ҳнапы аҵааҩуеит", — иҳәеит Габлиа.
Аусбарҭа аиҳабы иажәақәа рыла аԥхын Аԥсныи Лугански автоеимадара рыбжьалоит.
