АҞӘА, рашәарамза 6 – Sputnik, Роберт Џьопуа. АИН (Ашәахтәшәаҩы иидентификациатә номер) (ИНН) абланкқәа рыԥсахра азыԥхьагәанаҭеит Аԥсны Аминистрцәа Реилазаара иаднакылаз Ақәҵара "Аиуристтәи ахаҭалатәи анаплакыҩцәеи ашәахтә ҭаҩра рықәыргылара аԥҟара ашьақәыргыларазы" аҿы.
Ареспублика ашәахтәқәеи аизгақәеи рзы аминистр Даур Кәырмазиа иажәақәа рыла абланкқәа ԥсаххоит ԥхынгәы 1 инаркны ԥхынҷкәын 1 аҟынӡа.
"АИН (ИНН) абланкқәа ԥсаххоит. Ҳара ажәалагала ҟаҳҵеит ашәахтәшәаҩы иаку икод шьақәыргылахарц иарбанызаалак ашәахтәқәеи ауалқәеи ршәараан", — иҳәеит аминистр.
Иара иазгәеиҭеит абланкқәа хәыда-ԥсада ишыԥсаххо, ирласынгьы ишымҩаԥгахо.
Ашәахтәқәа рзы аминистр иара убасгьы ажәахә ҟаиҵеит Ақәҵара "Ахатә наплакыҩцәа рхашәала ашьақәыртәараан рхарџьқәа рышьақәыргылара аамҭалатәи рыԥҟара ашьақәырӷәӷәаразы" аганахь ала.
Иара иазгәеиҭеит аус зуа ахатәхаҿқәа ашәахтә рымхразы азакәан ишазыԥхьагәанамҭо урҭ рхарџьқәа.
Аамҭалатәи аԥҟара иалнаршоит ашәахтә органқәеи ашәахтәшәаҩцәеи рыбжьара иҟоу аимак зҵаарақәа рҭышәныртәалара.
Аминистрцәа Реилазаара аилатәараҟны ишьақәырӷәӷәан ашәахтәқәеи аизгақәеи рзы Аминистрра аколлегиа аилазаара.
Иааидкыланы аилатәараҟны ирыхәаԥшын амшхәаԥштә аҿы иқәгылаз 30 зҵаара.
