АҞӘА, жьҭаара 3- Sputnik, Бадраҟ Аҩӡба. Аҧсны ахада Рауль Ҳаџьымба аиҧылара аан иаарҧшит агәыӷра Ареспублика Сербтәи Аԥсныи аизыҟазаашьақәа аҿиара шроуа.
"Аҧсныҟа шәаара ҳаигәырӷеит, иахьа зышьҭаҵара ҳаҿу аизыҟазаашьақәа анаҩсгьы ишрыцҵахо агәра згоит", — иҳәеит атәыла ахада.
Аҧсныи Ареспублика Сербтәи рҭоурых еиҧшуп, рҧеиҧшгьы бзиахоит, азгәаиҭеит Ҳаџьымба.
"Ҳажәларқәа рмилаҭтә ҟазшьақәа еизааигәоуп, иахьеиҧшугьы ыҟоуп. Агәра згоит ҳҳәынҭқаррақәа аҿиаразы еиуеиҧшым ахархарҭақәа рыла аус шеицаауло", —инаҵишьит Ҳаџьымба.
Ареспублика Сербтәи ахада ихаҭыҧуаҩ Михаило Видич атәыла ахада иҭабуп ҳәа иаиҳәеит аиҧыларазы.
"Иахьа иацы имҩаҧыҳгоз аиҧыларақәа агәыӷра ҳнаҭоит ҳҳәынҭқаррақәа реизыҟазаашьақәа рырӷәӷәаразы. Иҟоуп хырхарҭақәак ҳусеицура алҵшәа бзиа ахьаиуша, аиҳарак атуризм аганахьала", —иҳәеит Видич.
Иара иажәақәа рыла Аҧсныҟа раара аҩҳәынҭқаррак аизыҟазаашьа бзиақәа раҧҵара алнаршоит.
"Ааҧхьара иаҳҭеит Аҧсны Ахәаахәҭра — Ааглыхратә палата ахадеи, аусдкылаҩцәеи, хықәкыла аиҿцәажәарақәа рымҩаҧгаразы", — еиҭаиҳәеит Видич.
Ареспублика Сербтәи ахәаахәҭреи атуризми рзы аминистр ихаҭыҧуаҩ Дусанка Тегелтиа иазгәалҭеит, аҳәынҭқаррақәа рыбжьара атуризм аҿиара анаҩс аҩтәылак рекономика аҿиара анырра шанаҭо. Аҧсны ахада ааҧхьара илҭеит Ареспублика Сербтәи ахь.
Ареспублика Сербтәи – Бисниеи Герцеговиниеи рҿы иҟоу ҳәынҭқарроуп. Иара аҧҵан 1992 шықәса рзы, анаҩс 1995 шықәса рзы Босниеи Герцеговиниеи иахәҭакхеит. Аҳҭнықалақь – Баниа-Лука.
