АҞӘА, жьҭаара 17– Sputnik, Бадри Есиава. Аԥсны апарламент адепутатцәа Дмитри Амаршьан Аҧсны Аҳәынҭқарраҿы ауаҩы изинқәа рыхьчаразы Аҷыдалкаатә зинмчы змоу имаҵзура аҟынтәи ихы дақәиҭыртәит.
"Азинхьчаратә орган иарбанызаалак аполитикатә партиак иаднамцәылозар ауп. Иахьатәи атәыла анапхгара имҩаԥырго аполитика сыдымкыло иазысыԥхьаӡоит напхгара зысҭо аинститут аполитикатә ҟазшьа амҭара. Убри инадҳәаланы имҩаԥызго анапынҵақәа рныҟәгара азин сымамкәа исыԥхьаӡоит", — иҳәеит иара.
Маршьан адепутатцәа ирзеиҭеиҳәеит иусураҟны изцәырҵуаз аԥынгылақәа ртәы.
Адепутатцәа аҽазныкгьы Дмитри Маршьан иарҳәеит арзаҳал анашьҭра дахымыццакырц, аха иара уи ҭабуп ахҳәааны мап ацәикит.
Ашәахьа, жьҭаара 16 рзы имҩаԥысуаз Аԥсны Жәлар Реизара адепутатцәа ахәаԥшит Дмитри Маршьан ихы дақәиҭыртәырц азы ирзынеишьҭыз арзаҳал. Адепутатцәа Дмитри Маршьан имаҵзураҟынтәи ихы дақәиҭыртәит.
