АҞӘА, ԥхынҷкәын 20— Sputnik, Бадраҟ Аҩӡба, Амра Амҷԥҳа. Аԥсны Ахада Рауль Ҳаџьымба Аԥсны Жәлар реизара – Апарламент ахь есышықәсатәи анашьҭымҭа ҟаиҵеит. Анашьҭымҭаҟны иазгәеиҭеит иахьа аус зуа азинхьчаратә система аусура хра аманы ишыҟам.
"Иҳәатәуп аҩныҵҟатәи аусқәа рорганқәа рструктура аибашьра ашьҭахьтәи аамҭақәа зегь рыҩныҵҟа акык-ҩбак ракәымзар ишыԥсахым. Амилициа аусура ҳәаақәызҵо азакәанԥҵара иахьатәи аҭахрақәеи аҭагылазаашьеи ирықәшәо иҟам", — иҳәеит иара.
Ахада ААР (МВД) анапхгара рнапы ианиҵеит егьырҭ азинхьчаратә органқәеи, адепутатцәеи, ауаажәларреи рыцырхыраан амилициа азакәан ҿыц апроект Апарламент ахь инаргарц.
"Азакәан ҿыц атәылауаа ринтересқәа еиҳа иахьчартә еиҿкаатәуп. Ауаажәларра рҟны амилициа аусзуҩ аҽакала, ҳаҭырла изныҟәо ишьақәыргылатәуп", — иҳәеит иара.
Атәыла Ахада ихымԥадатәны иазиԥхьаӡоит ААР (МВД) аилазаара аттестациа иахыжьтәуп ҳәа.
"Иҵарны иқәгылоуп аҩныҵҟатәи аусқәа рорганқәа рматериал-техникатә еиқәыршәара азҵаара, амилициа аусзуҩцәа ԥарала реиқәыршәареи рсоциалтә хьчареи", — иҳәеит Ҳаџьымба.
Атәыла Ахада иара убасгьы иҳәеит аҳәынҭқарратә усбарҭақәа рмаҵзурауаа ралхра аиндаҭларатә ҵаҵӷәы аманы иҟазар шахәҭоу.
Ари, Аԥсны Ахада Апарламент ахь аҩбатәи инашьҭымҭоуп. Актәи инашьҭымҭаан, 2016 шықәса рзы.
Ауснагӡатә амҩаԥысра иалахәуп: адепутатцәа, аминистррақәа рхадацәа, араионқәеи ақалақьқәеи реиҳабацәа, араионтәи ақалақьтәи еизарақәа рхаҭарнакцәа.
