АҞӘА, ажьырныҳәа 5 — Sputnik, Бадри Есиава. Аԥсны Ахада Рауль Ҳаџьымба Апарламенттә комиссиа аилатәарахь днеит. Изаамҭанытәиим Апарламент аилатәара мҩаԥысуеит иахьа, ажьырныҳәа 5 рзы, атеррорист Гьаргь Лукава ихараихыхра азҵаара инадҳәаланы. Абри атәы аҭыԥ аҟынтәи иааицҳауеит ҳкорреспондент.
Ҳаџьымба адепутатцәа ирзеиҭеиҳәеит аус ахы-аҵыхәа иныҭкааны. Иазгәеиҭеит агәрагара шимоу Аԥсны Аконституциа шеилагам азы.
Адепутатцәа ирымоуп имаҷымкәа азҵаарақәа Лукава ихарахыхра азакәаншьаҭеиԥш аморалтә ҟазшьа иамоу аганахь алагьы.
Ажьырныҳәа 3 2018 шықәса рзы Аԥсны Ахада Иусбарҭа аҿаԥхьа еизеит Лукава ақырҭуа ган дахьрырҭаз агәынамӡара знаҭаз рҟынтә. Еизаз азҵаара ықәдыргылон ацәгьауҩы иоушьҭра азин ҟазҵада ҳәа.
Иаԥҵан Апарламенттә комиссиа: Лукава иоушьҭра аиашареи аиашамреи шьақәзыргылаша. Иара иалахәуп: Илиа Гәниа, Валери Агрба, Алхас Џьинџьолиа, Дмитри Дбар, Инал Ҭарба, Асҭамыр Логәуа. Акомиссиа ахантәаҩы — Рауль Лолуа.
Ԥхынҷкәын 25 2017 шықәса рзы Гьаргь Лукава ихы дақәиҭтәны ақырҭуа ган дрыҭан.
