АҞӘА, жәабран 12 – Sputnik. Аԥсны апрофессионалтә бокс иапроблема хаданы иҟоуп азыҟаҵарақәа рзы азалқәа ишахәҭоу еиԥш реиҿымкаареи рыҟамзаареи. Абри атәы радио Sputnik иазеиҭеиҳәеит Аԥсны апрофессионалтә бокс азы Афедерациа апрезидент Альберт Карди оглы.
"Ҳара ҳзы ипроблема хаданы иҟоуп азыҟаҵарақәа рзы азалқәа ишахәҭоу еиԥш реиҿымкаареи рыҟамзаареи. Апрофессионалтә боксиор аҽазыҟаҵара илшоит иахәҭаны иҟоу зегь рыла еиқәыршәо азалқәа рҟны. Аспорткомплекс — ари ҳара ҳгәаҳәара дууоуп", — иҳәеит Карди оглы.
Аҽазыҟаҵаразы азалқәа рыҟамзаара жәларбжьаратәи аиндаҭларақәа рылахәрагьы аруадаҩуеит иҳәеит иара.
Альберт Карди оглы иазгәеиҭеит ауадаҩрақәа жәпакы шыҟоугьы Аԥсны апрофессионалтә бокс азы Афедерациа аусура алҵшәақәа шамоу, аиҳаракгьы 2017 шықәса рзы.
"2017 шықәса зегь раасҭа иҳақәҿиаз шықәсуп. Раԥхьаӡа акәны Пиатигорсктәи апрофессионалтә ринг ахьднеит ҳаԥсуа бираҟ иаҵагыланы еисуаз Саид Смыр. Саид Смыр аиааира игеит, ихьӡҳәараан Аԥсны агимн аҳәон", —иҳәоит Карди оглы.
Карди оглы иара убасгьы далацәажәеит аԥсуа боксиор Баҭал Чежьиа ииааирақәа.
Карди оглы иҳәеит ҳаспортсменцәа риааирақәеи, атурнирқәеи, аисарақәеи ҳҿар абри аспортхкы ишаднаԥхьало.
