АҞӘА, хәажәкыра 9 — Sputnik. Сариа Кәарацхьелиаԥҳа. Жәларбжьаратәи апрофессионалтә бокс ахәылԥаз аҟны иқәгылараны иҟоу Баҭал Чежьиа дзеисараны дыҟоу, Даӷьсҭантәи аспортсмен Мурад Далахаев иоуп. Абри атәы иҳәеит аспортсмен хаҭарнакра изызуа Инал Лагәлаа.
"Баҭал деисуеит аԥышәа ду змоу урыстәылатәи аспортсмен Мурад Далахаев. Иахьа, Баҭал Пиатегорск дыҟоуп. Иҽазҵәылхны аҿазыҟаҵарақәа дырҿуп", — иҳәеит иара.
Лагәлаа иажәақәа рыла, Далахаев Чежьиа иаасҭа акыр деиҳабуп, аԥышәагьы имоуп.
"Егьа ус иҟазаргьы Баҭал макьаназы аӡәгьы диҵамхацт. Сгәы иаанагоит ус иагьаанхоит ҳәа", — ациҵеит уи.
Апрофессионалтә бокс "Гладиатор" ахәылԥаз далахәхоит Баҭал Чежьиа. Ахәылԥаз мҩаԥысуеит Анапа, хәажәкыра 17 рзы.
