АҞӘА, хәажәкыра 29 – Sputnik, Бадри Есиава. Аробот-официант "Нарҭи" Аԥсны иазку зметраж кьаҿу афильм "Морской бризи" Москва аԥыжәара ргеит ҳәа Sputnik акорреспондент изеиҭеиҳәеит алицеи-интернат аробототехника акружок анапхгаҩы Александр Танакбаев.
"Аробот-официант "Нарҭ" знапкымҭоу 9 "б" акласс аҵаҩцәа Иван Агрба, Аллен Гамисониа, Рашид Кушба актәи аҭыԥ ааныркылеит аробототехниказ аиндаҭлара "Нашествие роботов" аҿы. Иара убасгьы акинофестиваль "Гимкинфест-1517" аҿы иреиӷьу ҳәа иалкаан 8 "а" акласс аҵаҩцәа Александр Аблоҭиеии Лука Арџьениеи зметраж кьаҿу рфильм "Морской бриз"", — иҳәеит Танакбаев.
Иара иажәақәа рыла аробот-официант "Нарҭ" уаанӡатәиқәа иреиԥшым. Уаанӡатәиқәа "Лего" ахәҭақәа ирылхызар, иара аметалл иалхуп.
"Аробот-официант агылаар метрак аҟынӡа иҟоуп, аԥынгылақәа ирхысуеит. Иҟанаҵо зегьы ҭынч-ҭынч иҟанаҵоит", — иҳәеит иара.
Гагратәи алицеи-интернат аҵаҩцәа алахәын хәажәкыра 23-25 рзы Москва имҩаԥысыз жәларбжьаратәи аҭҵаарадырра-практикатә конференциа "Объединяемся Знаниями" – 2018.
