АҞӘА, мшаԥы 2 – Sputnik, Бадраҟ Аҩӡба. Аҵиаақәа ркарантин азы аҳәынҭқарратә инспекциа аиҳабы Аркади Џьинџьиа Sputnik аинтервиу аҭо иҳәеит хәажәкыра 31 инаркны Қырҭтәылантәи аҵиаа-аалыҵ Аԥсныҟа аагара аанкылахоит амармалташь пты азҵаара ӡбахаанӡа ҳәа.
"Хәажәкыра 31 инаркны Қырҭтәылантәи аҵиаа-аалыҵ Аԥсныҟа аагара аанкылахоит амармалташь пты азҵаара ӡбахаанӡа, избанзар акарантинтә инспекциа иҟанаҵоз агәаҭарақәа раан изныкымкәа амармалташь пты гәарҭахьан", — иҳәеит Џьинџьиа.
Аҳәынҭинспекциа аусзуҩцәа Қырҭтәылеи Аԥсни рҳәааҿы аусурақәа мҩаԥыргоит иҳәеит аҵиаақәа ркарантин азы аҳәынҭқарратә инспекциа аиҳабы Аркади Џьинџьиа.
"Дара аҳәаа иахырго аалыҵ апты алазаара гәарҭоит", — иҳәеит иара.
Амармалташь пты иаҿагыланы ақәԥара хацыркуп ареспубликаҿы. Уи азы аферомонттә каҭақәа ҟарҵоит, уа еизнаго аптқәа ахимиа ахархәарала индырҵәоит.
Хәажәкыра 31 инаркны Қырҭтәылантәи аҵиаа-аалыҵ Аԥсныҟа аагара аанкылахоит амармалташь пты азҵаара ӡбахаанӡа.
Россельхознадзор акәзар, мшаԥы 2 инаркны Аԥснынтәи Урыстәылаҟа аҵиаа-аалыҵ аиагара ԥнакит аамҭала.
Хәажәкыра 30 рзы Россельхознадзор ахаҭарнак Иулиа Мелано Sputnik аинтервиу аҭо илҳәеит Аԥсны аҵакырахь амармалташь пты аара диверсиазар ҟалоит ҳәа. Уи зыхҟьо Қырҭтәыла аус зуа абиологиатә лабораториа аусура акәзар ауеит ҳәа агәаанагара лымоуп лара.
Амшын еиқәа иаԥну атәылақәа рҿы апты цәырҵит ԥшьышықәса раԥхьа.
