АҞӘА, лаҵара 30 – Sputnik. Қырҭтәыла Шьамтәылеи иареи рдипломатиатә еизыҟазаашьа аанкылара апроцедура хацнаркуеит, Дамаск Аԥсни Аахыҵ Уаԥстәылеи рхьыԥшымра шазханаҵаз анрыланаҳәа ашьҭахь ҳәа аанацҳауеит РИА Новости, Қырҭтәыла Адәныҟатәи аусқәа рминистр ихаҭыԥуаҩ Давид Дондуа иажәақәа шьаҭас иганы.
"Қырҭтәыла Шьамтәылеи иареи рдипломатиатә еизыҟазаашьа аанкылара апроцедура хацнаркуеит, Дамаск Аԥсни Аахыҵ Уаԥстәылеи рхьыԥшымра шазханаҵаз анрыланаҳәа ашьҭахь", — иҳәеит Қырҭтәыла Адәныҟатәи аусқәа рминистр ихаҭыԥуаҩ Давид Дондуа ибрифинг аҟны.
Нанҳәа 26 рзы ареспубликаҿы иазгәарҭоит Аԥсны ахьыԥшымра жәларбжьаратәи азхаҵара амш. Нанҳәа 26 2008 шықәсазы Урыстәылатәи Афедерациа Аԥсны Ахьыԥшымра азханаҵеит. Уи азы аусԥҟа инапы аҵеиҩит усҟантәи Урыстәыла Ахада Дмитри Медведев.
Аԥсны Жәлар Рџьынџьтәылатә еибашьра 1992-1993 шықәса алҵшәақәа рыла иаагаз ахьыԥшымра Урыстәылатәи Афедерациа 2008 шықәса нанаҳәа 26 рзы ианазханаҵа инаркны иалагеит ахьыԥшмыра Жәларбжьаратәи азхаҵара.
Иахьатәи амш азы Аԥсны ахьыԥшымра азхарҵахьеит Еиду Амилаҭқәа Реиҿкаара иалоу ф-ҳәынҭқаррак – Урыстәылатәи Афедерациа, Никарагуа, Венесуела, Науру, Вануату, Тувалу.
