Cусанна Ҭаниаԥҳа, Sputnik
Апоет ирҿиара иазҿлымҳаз ауаажәларратә усзуҩцәа, аҵарауаа, апоетцәа, ашәҟәыҩҩцәа, арҵаҩцәа, астудентцәа, иара ус алитература абзиабаҩцәа зегьы атеатр иаҭааит апоет дыргәаладыршәарц.
Ажурналист, амҩаԥгаҩ Рада Аргәын ахәылԥаз аалыртит апоет ицәаҳәақәа "Ишԥабзиоу ауаҩы ииуа ииҳәо еиқәшәозар" ала. Иазгәалҭеит, апоет ииумор – исатира угәы атымитыша иагәылган изго акы акәны ишыҟоу.
Анаҩс, еизаз зегьы идырбан Кьыршьал Шамил-иԥа иԥсҭазаареи ирҿиаратә мҩеи иазкыз адокументалтә фильм. Афильм аҿы иаарԥшын апоет дахьииз иқыҭа гәакьа Ԥақәашь иазкыз игәалашәарақәеи дызҿыԥшуаз, рҵаҩыс имаз Леонти Лабахәуа изкыз игәалашәарақәеи. Уа ажәа ихырҳәааит: алитератураҭҵааҩ Владимир Агрба, аҭоурыхҭҵааҩ Ермолаи Аџьынџьал, афилологиатә ҭҵаарадыррақәа рдоктор Валери Кәарҷиа, апоет Терент Ҷаниа, уҳәа реиԥш иҟаз ауаа нагақәа.
Адокументалтә фильм анхыркәшаха, ажәа рыҭан апоет, Аԥсны Ахада иабжьгаҩ Владимир Занҭариеи апоет, аҵарауаҩ Денис Чачхалиеи.
Владимир Занҭариа ажәа лыԥшаахла дахцәажәеит апоет инысымҩа, даԥхьеит "Еимаркуазеи", "Абгахәыҷы аҟара кәтыжь зфахьада", реиԥш иҟоу асатиратә жәеинраалақәа. Денис Кьыршьал-иԥа иакәзар, иаб изку гәалашәарақәак еизаз ирзеиҭаиҳәеит, дырзаԥхьеит асатиратә жәеинраалақәа.
Аԥсны Ашәҟәыҩҩцәа реидгыла ахантәаҩы, апоет Вахтанг Аԥҳазоу иҳәоит:
"Апоет имҩа хыхь-гәыхь шацызгьы, хьаҵра закәу издыруамызт, иааирԥшуазгьы аԥсҭазаара иалаҵәҟьаз ахаҿсахьақәа ракәын. Иҩымҭақәа рбызшәа цқьан, ргәынкылара мариан. Згәы каҳан иҟаз рзы — игәышьҭыхган".
Апоет Гәында Сақаниаԥҳа даԥхьеит апоет иажәеинраалақәа, уи иазгәалҭеит: "Кьыршьал аамҭа даиааит, аамҭа дақәлахеит. Ажәлар рыбзиабара иалнахыз, наӡаӡа ргәаҵаҿы даанхоит" ҳәа.
Ахәылԥаз иалахәын Аԥсуа драматә театр актиорцәа Даур Арухааи Саид Лазбеи. Урҭ аԥсы ахаҵаны иаԥхьеит апоет иажәеинраалақәа.
Иазгәаҭатәуп, Кьыршьал Чачхалиа апоет-сатирикк иаҳасабала ихьӡ шаҳдыруагьы, уи ипоезиа абзиабаратә тематика рахәыц ҟаԥшьыла ишалгоу. Иаԥиҵахьеит ԥсра-ӡра зқәым абзиабаратә жәеинраалақәа, урҭ иреиуоуп "Лассы-лассы бысгәалашәоит".
Иазгәаҭатәуп, 1968 шықәсазы ари ажәеинраалазы амузыка иҩит аԥсуа композитор Руслан Агәмаа, иналыгӡеит Виолетта Маанԥҳа. Убри аахыс ажәлар ирылаҵәеит, сынтәа уи ашәа иахыҵит 50 шықәса.
Кьыршьал Чачхалиа иажәеинраалақәа жәпакы ашәақәа рылырххьан, урҭ иреиуан: "Фама", "О, сыԥшӡа, Сыԥсынтәыла", "Абзиабара", "Аҽҵыс".
Лаҵарамза 30 рзы Кьыршьал Чачхалиа Аҟәа дахьынхоз иуадаҿы икнаҳан агәаларшәагатә ҭӡы.
Иаарласны иҭыҵран иҟоуп Уасил Шамониа-иԥаа Аҩӡба еиқәиршәаз иубилеитәу ҩ-томкны иҟоу Кьыршьал Чачхалиа иҩымҭақәа реизга.
Алитератураҭҵааҩ, акритик Владимир Аҵнариа "аччара арыцарь" ҳәа дзышьҭаз Кьыршьал Шамил-иԥа Чачхалиа иԥсҭазаара далҵит рашәарамза 4, 1970 шықәсазы 52 шықәса дшырҭагылаз.
![Торжественный вечер в честь 100-летия со дня рождения Киршала Чачхалия Торжественный вечер в честь 100-летия со дня рождения Киршала Чачхалия - Sputnik Аҧсны](https://cdnn1.img.sputnik-abkhazia.info/img/102409/64/1024096469_0:0:1500:1000_600x0_80_0_0_0579c09b7f172adf545f153dfe43e40c.jpg)