АҞӘА, ԥхынгәы 2 – Sputnik, Бадри Есиава. Александр Семенцов ицәыргақәҵа мҩаԥысуеит Санкт-Петербургтәи Аҳәынҭқарратә музеи аҿы рашәара 28 инаркны нанҳәа 12 рҟынӡа. Абри атәы Sputnik иазеиҭалҳәеит иԥҳа Елена Семенцова.
"Асериа "Леди" иаҵанакуа асахьақәа Аԥсны Аџьынџьтәылатә еибашьра иазкуп, "Апокалипсис" асериа иаҵанакуа – Чечниатәи аибашьра. Ацәыргақәҵахь инагоуп зынӡа 67 усумҭа", — ҳәа еиҭалҳәоит Семенцова.
Аԥснытәи аибашьра иазку Александр Семенцов иусумҭақәа иреиуоуп: "Верхняя Эшера", "Вторжение", "Папа, разве они топчут цветы?", "Придет весна, вернутся дети?".
""Придет весна, вернутся дети?" сара зегь раасҭа бзиа избо усумҭоуп. Ацәыргақәҵа афишаҿ ианын. Исгәаԥхоит акомпозициа, агама. Асахьа асимвол ҵакы амоуп", — лҳәоит Елена Семенцова.
Ацәыргақәҵа аартраан ауаа рацән ҳәа еиҭалҳәоит Елена, иагьазгәалҭоит урҭ реиҳараҩык аҟазараҭҵааҩцәа, афотоҭыхыҩцәа, ажурналистцәа, аҟазара абзиабаҩцәа шракәыз.
Александр Семенцов изы Аԥсны иҷыдоу аҭыԥ ааннакылоит иҟазараҿы еиԥш иԥсҭазаараҿгьы ҳәа лҳәоит асахьаҭыхыҩ иԥҳа. Иара лара лхаҭагьы усоуп Аԥсны дшазыҟоу. Иалшозар ес-ԥхынра Аԥсны даҭаауеит.
"Ацәыргақәҵа аиҿкаара адгылара аиҭеит аԥсуа меценат Николаи Ачба. Иара икорпорациоуп ацәыргақәҵа спонсор хадас иазыҟалаз- ӡынрала сара Санкт-Петербург сынхоит, аха ԥхынрала Аҟәаҟа саауеит. Аԥсни сареи акыр ҳаизааигәоуп", — ҳәа еиҭалҳәоит Елена.
Александр Семенцов ицәыргақәҵа аартраан, Санкт-Петербург аԥсуа ҩы ржәуан, Аԥсны аизҳазыӷьара азеиӷьашьо аԥаҭхьқәа шьҭырхуан лҳәоит лара. Иагьазгәалҭеит аԥснытәи арыжәтә арестораторцәа аинтерес шыркыз.
Асовет сахьаҭыхыҩ Александр Семенцов диит Керчь, лаҵара 17 1941 шықәса рзы. Далгеит Қарҭтәи асахьаҭыхратә академиа.
1970 — 1986 шықәсқәа рзы Семенцов изныкымкәа имҩаԥигахьан ацәыргақәҵақәа Қарҭи Аҟәеи.
1990-тәҿи ашықәсқәа рзы Аҟәантәи Ленинградҟа нхараҳәа диасит.
Александр Семенцов иԥсҭазаара далҵит хәажәкыра 17 2005 шықәса рзы, Санкт-Петербург.
