Какалиа: азанааҭ амшала аусураҟны згәабзиара ааха азҭаз рыԥсшьара ҳазхәыцуеит

"Иааиуа ашықәс азы ззанааҭтә усура иахҟьаны ачымазара, мамзар ааха зауз рыԥсшьара аиҿкаара алҳаршарц азҵаара ҳазхәыцуеит. Уи азы агәабзиарахьчара аминистрреи ҳареи иаартны ҳаицәажәар ҳҭахуп. Хышықәса раахыижьҭеи ҳазхәыцуеит.  Ичмазаҩхаз ауаа рзы хазы иҳамоуп хә-миллионк мааҭ арбаны, урҭ ишычмазаҩхаз азы абӷьыц аннаргалак, аԥара рзыршәоит. Аусураҟны згәабзиара ҵызшәааз ауаа рзы ареабилитациатә центр Аԥсны иҳамаӡам, аха ҳрацәажәоит урыстәылатәи ҳколлегацәа. Аибашьра ҟалаанӡа Тҟәарчал иҟан угәабзиара шьақәуыргылар ахьулшоз ацентр. Иахьазы уи хатә фирманы иаадыртит, аиқәшаҳаҭрагьы ҳабжьаҳҵеит. Афонд аганахьала ирыдаагало ҳалагоит альготақәа рыла ауаа ргәабзиара шьақәдыргыларц", — иҳәеит Какалиа.