АҞӘА, абҵара 28— Sputnik. Аҩаша, абҵара 27 рзы америкатәи аҳаирплан Boeing P-8A Poseidon Ҟрым иахьаҵанакуа аԥшаҳәатә цәаҳәа ааигәара аԥшыхәрақәа мҩаԥнагеит ҳәа аанацҳаит РИА Новости, апортал PlaneRadar адыррақәа шьаҭас иганы.
Аҳаирплан (№168848) ЕАШ аҳаир-мшынтә мчрақәа 26-тәи аескадрилиа иаҵанакуеит. Аҳаирплан амшынԥшаҳәа 31 километра иазааигәаны аԥшыхәратә хаԥырра мҩаԥнагеит.
PlaneRadar адыррақәа рыла, иара абри амш азы иара убасгьы Донбасс аиҟәыгаратә цәаҳәа аԥшыхәратә хаԥырра мҩаԥнагеит аԥырҩы дызҭам аҳаирплан RQ-4A Global Hawk.
Урыстәыла атәылахьчара аминистрра изныкымкәа ааԥхьара ҟанаҵахьеит асеиԥш иҟоу ауснагӡатәқәа Вашингтон мап ацәнакырц.
Boeing P-8 Poseidon — амшынаҵатәи аӷбақәа рҭаԥшыхәреи рҭархареи иазырхоуп.
RQ-4 Global Hawk — аԥырҩы дызҭам стратегиа-ҭаԥшыхәратә ҳаирыплануп. Иара ҵәҩанҵәа 18 000 метра рҟынӡа ахалара алшоит.
Уаанӡа Урыстәыла Ашәарҭадаратә маҵзура аҳәамҭа ҟанаҵахьан Украина арра-мшынтә флот аӷбақәа "Бердянск", "Никополь", "Яна Капу" Урыстәыла аҳәынҭқарратә ҳәаа еиларгеит, дара мҩаԥызгоз Урыстәыла амшынеиқәатә флоти Афедералтә шәарҭадаратә маҵзура аҳәаахьчаратә маҵзура рыӷбақәеи рышхәақәеи иаангыларц азы иҟарҵоз адҵа иаххәыцуамызт ҳәа. Абри ашьҭахь аӷбақәа аанкылахеит.
Украина Атәылахьчара аминистрра аҳәамҭала арратә ҭагылазаашьа алагалара шьаҭас иҟаҵаны арратә мчрақәа азыхиара ҳаракы рымоуп.
Украина арратә ҭагылазаашьа алагалара шьақәнарӷәӷәеит Иреиҳаӡоу рада.
