"Иаарласны ареферендум мҩаԥганы, ақалақь ахада иалхрахь ҳаиасыр иаҳа еиӷьхоит ҳәа аҳәара сцәыцәгьоуп. Ари аус иазхәыцтәуп, иара иацу азҵаарақәа азыӡбатәуп. Ҳара ҳмилаҭ злаҟоу ала, ауаажәаларраҿы иҟоу аҽеиҩшарала, ари аус ауадаҩрақәа цәырнагар ҟалоит. Иҟоуп аҳәынҭқаррақәа асистема анырыԥсахуа, зны ицәырыргоит, иалацәажәоит, аҿҳәара аҭаны рҽазыҟарҵоит, ицәырҵырц зылшо азҵаарақәа зегьы азырыӡбоит", - ҳәа азгәеиҭеит Хапат.
Аҟәа ақалақь ауааԥсыра ақалақь ахада иалхразы алшара рыҭаразы, насгьы уи азы ареферендум амҩаԥгарала ашьақәырӷәӷәаразы ақалақьтә еизара иаднакылаз аӡбамҭа инамаданы Аԥсны ахада иҭижьит уи мап ацәызкуа аусԥҟа, уи шьаҭасгьы иаиҭеит атәыла Аконституциа азакәан Аԥсны административтә адгьылҵакыра анапхгараҭаразы иаҿагылоит ҳәа.
Абҵарамза 28 рзы Аԥсны ауаажәаларратә апалата ақалақь ахада иалхразы ареферендум амҩаԥгара азҵаарала аилатәара мҩаԥысит.
Аиҿцәажәара инарҭбаан шәазыӡырҩыр ҟалоит арадио Sputnik Аԥсны ишиашоу ицо аефир аҟны, асааҭ 18:00 рзы.
