АҞӘА, ԥхынҷкәын 12 – Sputnik, Асмаҭ Ҵәыџьԥҳа. Аҟәатәи жәларбжьаратәи акинофестиваль азыҳәақәа аднакыло иалагеит ԥхынҷкәын 10 инаркны ҳәа Sputnik иазеиҭеиҳәеит акинофестиваль адиректор Ҭемыр Кәакәасқьыр.
"Критери хаданы иҟоу – афильм аметраж кьаҿзароуп. Иаарышьҭуа афильмқәа зегьы акинофестиваль аицлабрахь ишзымнеиуа еилкаауп, аха ҳгәыӷуеит зхаҭабзиара ҳараку аусумҭақәа ҟалап ҳәа", — иҳәоит адиректор.
Аҟәатәи жәларбжьаратәи акинофестиваль ахь азыҳәақәа рынашьҭра алшоит акинофестиваль аофициалтә саит ахь, аплатформа Filmfreeway ахархәарала.
"Ҵыԥх ҳара иҳауит х-нызқь рҟынӡа зыҳәа адунеи атәылақәа жәпакы рҟынтә. Ҳгәыӷуеит сынтәа еиҳамхозар еиҵхарым ҳәа", — иҳәоит акинофестиваль адиректор Ҭемыр Кәакәасқьыр.
Аҟәатәи аҩбатәи жәларбжьаратәи акинофестиваль мҩаԥысраны иҟоуп Аԥсны, 2019 шықәса, мшаԥымза 18 — 22 рзы. Хәымш рыҩныҵҟа 20-30 киносахьа дырбахоит. Аиҿкааҩцәа иара убасгьы ирыгәҭакуп акинематографиаз амастер-классқәа реиҿкаара.
"Ҳасасцәа рзы акультуратә программа еиҿкаахоит. Аԥсны аҭыԥ ԥшӡарақәа дырбахоит", — иҳәоит иара.
Аҟәатәи актәи жәларбжьаратәи акинофестиваль мҩаԥысит Аҟәа 2018 шықәса рзы, 16 тәыла рхаҭарнакцәа алархәны.
