АҞӘА, ажьырныҳәа 15 — Sputnik. Урыстәыла ахада ипресс-маӡаныҟәгаҩ Дмитри Песков Урыстәылеи Америкеи рхадацәа рыбжьара ацәыҵацәажәарақәа мҩаԥысуеит ҳәа ирҳәо ҵаҵӷәыдоуп ҳәа ахиҳәааит.
"Асеиԥш ажәабжьгәараҵара иарбанызаалак иашарак аҵам. Америка ауаажәларратә еилазаара еиҟәшоуп. Еиҟәшоу аиҳабырагьы. Убарҭ ирыхҟьаны иҟоу аҭагылазаашьа уадаҩ аҿы аусура иқәшәеит Трамп", - ҳәа иҳәеит Песков агазеҭ "Аргументы и факты" аинтервиу аҭо.
Песков иажәақәа рыла Урыстәыла иаҿагыло асанкциақәа ибаша-машаны иубом. Ҷыдала, апроект "Северный поток-2" иаҿагыло асанкциақәа ҵаҵӷәыс ирымоу урыстәылатәи агаз аасҭа зыхәԥса еиҳау америкатәи агаз аҭира алыршароуп.
40 шықәса инареиҳауп Урыстәыла еиуеиԥшым асанкциақәа адҟарҵалоижьҭеи иҳәеит Песков, убри аан Вашингтон иамам алшара Урыстәыла асуверентә политика мап ацәнакуа аҟаҵаразы.
