АҞӘА, ажьырныҳәа 25 – Sputnik. Венесуела – Урыстәыла иастратегиатә партниоруп, адгыларагьы анаҭоит ҳәа иҳәеит Урыстәыла адәныҟатәи аусқәа рминистр ихаҭыԥуаҩ Сергеи Риабков ажурнал "Международная жизнь" аинтервиу анеиҭоз.
Москва Каракас асуверенитет ахьчара иазыхиоуп ҳәа иҳәоит адипломат.
"Ҳара ари мӡакәа иаҳҳәоит. Ҳпозициа аӡәгьы ицәаҳҵәахуам. Венесуела – Урыстәыла иастратегиатә партниоруп, адгыларагьы анаҭоит", - иҳәеит Риабков.
Адипломат иажәақәа рыла, ЕАА назло тәылақәак ргәыԥ Венесуела ақәыӷәӷәаразы рхы иадырхәоит америкатәи аҳәынҭқаррақәа Реиҿкаара. Иара иҳәеит Москва атәылақәа рыҩба рыбжьара аусеицура ԥхьаҟагьы ишарҿиало.
Венесуела аоппозициатә парламент аиҳабы Хуан Гуаидо атәыла ахада инапынҵақәа назыгӡо ҳәа ихы рылеиҳәеит ажьырныҳәа 23 рзы. Хуан Гуаидо аҳәамҭа ҟаиҵеит аконституциатә зинеиҿкаара ахьчаразы аамҭалатәи аусбарҭақәа шаԥиҵои ажәлар ирымхыз активқәа рырхынҳәразы афонд шаԥиҵои.
Вашингтон Венесуела аоппозициатә парламент аиҳабы Хуан Гуаидо атәыла аамҭалатәи ахада ҳәа дазханаҵеит.
Ажьырныҳәа 24 рзы Каракас амҩадуқәа рҿы аиҳабыратә мчрақәеи излагаз амитингқәа рлахәылацәеи рыбжьара аиҿагылара ӷәӷәа ҟалеит. Иҭахахьеит 16-ҩык ауааԥсыра.
