АҞӘА, ажьырныҳәа 26 — Sputnik. Асмаҭ Ҵәыџьԥҳа. Дырмит Гәлиа ихьӡ зху Аҳәынҭқарратә премиа аиуразы аконкурс аҟны иалахәхар ҟалоит алитературеи, аҟазареи, архитектуреи русхкқәа рҟны иаԥҵоу аусумҭақәа, иҳәеит Аԥсны ахада иабжьгаҩ, акомиссиа ахаҭарнак Владимир Занҭариа.
Занҭариа иажәақәа рыла, аусумҭақәа ралхреи рыхәаԥшреи раан хадара змоу ахаҭабзиароуп.
"Апрофессионализм ауп зегьы ирыцку. Аԥҵамҭа атема, уи аидеиа, стилистикатә ҿыцрақәас иаланагало - абри зегьы ахьынӡаарԥшу ҷыдала иазнеитәуп. Алитературатә жанр атәы уҳәозар, аҩымҭа аԥхьаҩ игәаҵанӡа иахьынӡанеиуа, ауаҩы иҩнуҵҟатәи идунеихәаԥшра иахьынӡаныруа, имилаҭтә психологиа ахьынӡаанарԥшуа ауп ҳазхәаԥшуа", - иҳәеит Владимир Занҭариа.
Алитературатә ҩымҭақәа ртәы далацәажәо, Занҭариа иазгәеиҭеит, аҳәынҭқарратә премиа аԥҟаԥҵәа инақәыршәаны, урҭ хазы игоу екземплиарны икьыԥхьны иҭыжьзар шрыхәҭоу. Архитектуратә усумҭақәа ракәзар - асахьаркыратә макет аҳасабала ирыдгалазароуп.
Иара иажәақәа рыла, есышықәса ари аконкурс рхы аладырхәуеит еицырдыруа ашәҟәыҩҩцәеи, апоетцәеи, аскульпторцәеи рыдагьы, уи знапы алазкыз абиԥара ҿыц ахаҭарнакцәагьы.
"30 шықәса раԥхьа абиԥарақәа реимадара бжьаӡыр ҳәа ҳшәозҭгьы, иахьатәи амш азы гәыҩбарада иаҳҳәар ҳалшоит аԥсуа литератураҟны, еиҳаракгьы апоезиаҟны, аҟыбаҩ злоу авторцәа маҷҩымкәа ишцәырҵыз. Урҭ рахьтә 7-8-ҩык инарзынаԥшуа рыхьӡ сҳәар сылшоит, зусумҭақәа ҩаӡара ҳаракыла ицәырызгар зылшо азҟазацәа", - иазгәеиҭеит Занҭариа.
Акомиссиа аусумҭақәа ахәаԥшразы иаднакылоит нанҳәамза 1, 2019 шықәсанӡа. Арзаҳалқәа аларҵар ҟалоит Дырмит Гәлиа ихьӡ зху Аҳәынҭқарратә премиазы Акомиссиаҟны абри аҭыӡҭыԥ ала: Ажәанба имҩа, 9, есԥшьаша, асааҭ 10:00 инаркны 15:00 рҟынӡа.
Дырмит Гәлиа ихьӡ зху Аҳәынҭқарратә премиазы Акомиссиа раԥхьаӡа акәны иаԥҵан 1967 шықәсазы. Ари апремиа раԥхьатәи алауреатцәас иҟалеит аԥсуа шәҟәыҩҩцәа Баграт Шьынқәбеи Иван Папасқьыри. Алитературеи, аҟазареи, архитектуреи русхкқәа рҟны ари апремиа есхышықәса ирырҭоит.
