АҞӘА, мшаԥы 9 – Sputnik. Апассаџьырцәеи аидарақәеи мҩанызго автомашьынақәа рныҟәцаҩцәа рзы аиԥшратә документқәа – ахсаалақәа алагалахоит ҳәа радио Sputnik иазеиҭеиҳәеит атранспорт азы Аԥсны аҳәынҭқарратә усбарҭа аҟәша аиҳабы Руслан Ҳаразиа.
Ижәны амашьына аԥсҟы зку ршьа анализ ала рҭагылазаашьа гәарҭалоит
Аиԥшратә документ-ахсаала аиҿкаара иахьӡатәуп мшаԥы 25 рҟынӡа. Адокумент аиҿкааразы азыҳәа хәыда-ԥсадоуп. Уи азы ихымԥадатәиуп апассаџьырцәа ма аидарақәа рымҩангаразы азин ҷыда амазаареи автотранспорт азы адокументқәа рымазаареи.
Аиԥшратә документқәа-ахсаалақәа ралагалара рыӡбеит амашьынарныҟәцаҩцәа ргәаҭара, рхылаԥшра армариаразы.
"Аидеиа иҿыцу акакәым. Уаанӡа алицензиатә хсаалақәа ракәын иҟаз. Нас урҭ аԥырхит, аха еивыгара ҳәа акгьы рымам. Ҳара ҳауп иаԥшьызгаз аҩныҵҟатә хылаԥшразы ахсаалақәа алагалазарц. Уаанӡа, ахылаԥшратә ҟәша агәаҭарақәа рахь рнеираан, автотранспорт аанкыланы арныҟәцаҩ идокументқәа гәаҳҭонаҵы апассаџьырцәа ааԥсара, агәҭынчымра аадырԥшуан. Зегьы рзы иманшәаламызт. Убри азы ахсаала аформа ҿыц алаагалеит. Иара атранспорт азы, арныҟәцаҩ изы иахәҭаны иҟоу аинформациа зегьы аныԥшуеит", - ҳәа иҳәоит Руслан Ҳаразиа.
Адокумент ҿыц аԥснытәи амашьынарныҟәцаҩцәа роуп измазар зыхәҭо.
Аԥсны аиҳабыра аԥсахрақәа аларгалеит "Апассаџьырцәа автобабилтә транспорт ала рымҩаԥгареи иара убасгьы аидарақәа жәларбжьаратәи автомабилтә мҩангара рыҭаразы азин ҷыда аҟаҵараз Аԥҟара".
