АҞӘА, жьҭаара 17 – Sputnik, Асмаҭ Ҵәыџьԥҳа. АУН "Амшынеиқәафымцамч" анапхгара ажәалагала ҟанаҵеит астанциа маҷқәа "Гечрыԥшьи" "Ԥсоуи" рыбжьара афымцацәаҳәа 110 кВ мҩангазарц Гагра араион ҭагалан-аӡынтәи аамҭахҵәахазы лашарала еиқәыршәазарц азы. Абри атәы Sputnik иазеиҭеиҳәеит АУН "Амшынеиқәафымцамч" анџьныр хада ихаҭыԥуаҩ Николаи Барановски.
Астанциа маҷ "Бзыԥ-220" аҟны 60 мегаватт иҟоу атрансформатор "АТ-2" ырцәан ашәахьа, жьҭаара 7 рзы. Авариа аҟалара мзызны иаиуит афымцацәаҳәа "Ԥсоу – 220 кВ" амацәыс аахара. Авариа иахҟьаны Гагра араион ахәҭак лашарада иаанхеит.
"Атрансформатор "АТ-2" 50 шықәса инарзынаԥшуа ҳхы иаҳархәоит. Ҭагалан-аӡынтәи аамҭазы аидара рацәа иаҵалоит. Атрансформатор адиагностика ахыжьраан ишьақәыргылахеит ацәаҳәакәырша шажәыз. Амацәыс анас, атрансформатор аусура иаҟәыҵит. Атрансформатор аремонт азура ҟалом", - иҳәеит Барановски.
Барановски иажәақәа рыла, астанциа маҷқәа "Гечрыԥшьи" "Ԥсоуи" рыбжьара иргылахо афымцацәаҳәа Гагра араион зегьы еиԥҟьарада лашарала еиқәнаршәоит. Ус анакәымха, ҭагалан-аӡынтәи аамҭазы араион аҿы аамҭа-аамҭала афымца арцәара аграфик алагалатәхоит.
"АУН "Амшынеиқәафымцамч" нанҳәамзазы атрансформатор ҿыц ҿанаҵеит, аха иара ааргоит ԥхынҷкәын анҵәамҭаз ма 2020 шықәса алагамҭаз. Ҭагалан-аӡынтәи аамҭа иалагоит абҵара 5-15 рзы", - иҳәеит иара.
Барановски иажәақәа рыла, уажәы Гагра араион афымцамч рацәаны иннахуам. Авариатә ҭагылазаашьаан аусура иаларган атрансформатор "АТ-1".
"Аха, атрансформатор "АТ-1" акыр инықәсхьеит. Жьҭаара 7 рзы аремонтҟаҵарахь инагатәын, аха иахьатәи аҭагылазаашьа иаҿырԥшны аусура иалаҳаргар акәхеит", - иҳәоит Барановски.
Астанциа маҷ "Бзыԥ-220" аҟны атрансформатор "АТ-2" ырцәан ашәахьа, жьҭаара 7 рзы. Авариа аҟалара мзызс иаман афымцацәаҳәа "Ԥсоу – 220 кВ" амацәыс асра.
Иара убас шәаԥхьар ҟалоит:
-
Афымцамч ахәԥсашәаразы азинҷыдақәа змоу рхыԥхьаӡара хә-нызқь рыла илаҟәуеит
