АҞӘА, жәабран 27 – Sputnik, Бадри Есиава. Аспектакльқәа "Буратинои" "Ашьаарҵәыратә чареи" РУСДРАМ аҿы иқәыргылахоит хәажәкыреи мшаԥи рзы ҳәа Sputnik иазеиҭеиҳәеит атеатр адиректор хада Иракли Хынҭәба.
"Асезон ҿыц аартра иазкыз апресс-конференциаҿы ишҳәаз инақәыршәаны, ашықәс актәи азбжазы х-спектакльк ӡыраагароуп. Урҭ руак - "Оскар" – жәабран алагамҭазы иӡырган. Лассы ишәыдаагалараны иҟоуп Алексеи Толстои илакә " Буратино ихҭысқәа" иалху аспектакль ", - иҳәеит иара.
"Буратино ихҭысқәа" Џьамбул Жорданиа иавтортә спектакль ауп. Аԥхьарбара мҩаԥгахоит хәажәкыра 6 - 7 рзы. Адекорациақәа азирхиеит Витали Қацәба, ацәамаҭәа асахьаҭыхыҩ - Наталиа Шпанова (Санкт-Петербург).
Мшаԥы 23 - 24 рзы РУСДРАМ иӡырнагоит испаниатәи апоет Федерико Гарсиа Лорка ипиеса иалху аспектакль "Ашьаарҵәыратә чара" (арежиссиор Мариа Романова. Санкт-Петербург).
"Лара аспектакль лхатә знеишьа алҭеит. Сара иахьынӡеилыскаауа ала, даара ҳхызхша спектакльхоит. Лорка ирҿиамҭа ахаҭа акәзар – поезиоуп. Абзиабареи аԥсреи рышьхәа шеивҵоу атәы аҳәоит, иаҳәоит зны-зынла ауаҩы иҟаландаз ҳәа дзеиԥхыӡуа уаҩытәыҩсак иаҳасаб ала дыԥнаҽыр шауа", - иҳәоит Хынҭәба.
Ароль хадақәа ихәмаруеит Мадлена Барцыцԥҳаи Осман Абыхәбеи.
"Ҳгәы ҭамгыло аԥхьарбара ҳазыԥшуп. 2020 шықәсазтәи акультуратә ԥсҭазаараҿы аҭыԥ ду ааннакылараны иҟоуп ҳәа ҳахәаԥшуеит. Аспектакль аус адуларазы иадԥхьалоуп Санкт-Петербургтәи акоманда – ахореограф Римма Саркисиан, алашаразы асахьаҭыхыҩ Денис Солнцев, асахьаҭыхыҩ-ақәыргылаҩ – Мариа Филаретова, ацәамаҭәазы асахьаҭыхыҩ – Наталиа Шпанова", - иҳәеит иара.
2020 шықәсазтәи раԥхьатәи аспектакль "Оскар" иахәаԥшхьеит 1500-ҩык рҟынӡа атеатр абзиабаҩцәа.
Иара убас шәаԥхьар ҟалоит:
-
РУСДРАМ аусзуҩцәа Чехов ихьӡ зху атеатр аҿы рԥышәа еиздырҳауеит
-
Ахаҵамԥҳәысреи ашьоуреи: антикатәи адрамеи иахьатәи ҳаԥсҭазаареи "Електра" аҿы
