АҞӘА, мшаԥы 8 - Sputnik. Аԥсны ахада инапынҵақәа назыгӡо Валери Бганба Гагра араион аҿы акоменданттә сааҭ алагаларазы аусдҵа инапы аҵаиҩит.
Аусдҵа атекст аҿы иҳәоуп:
- Гагра араион иахьаҵанакуа акоменданттә сааҭ алагалазааит асааҭ 20.00 инаркны асааҭ 07.00 рҟынӡа.
- Акоменданттә сааҭ аан ауааԥсыра рынхарҭақәа ныжьны адәахьы идәылҵыр ҟалом, азинмчратә усбарҭақәеи, агәабзиарахьчара аусҳәарҭақәеи, амцарцәаратәии акоммуналтәии маҵзурақәеи русзуҩцәеи, абанктә инфраструктура аусура аиҿкаара еиқәзыршәои рыда.
- Аԥсны Аҩнуҵҟатәи аусқәа рминистрра анапы ианҵазааит акоменданттә сааҭ аамҭазы абри Аусдҵа еилазго ахаҿқәа раанкылара еиҿкаазарц.
- Аусдҵа амчра аиуеит ианкьыԥхьха инаркны.
Акоменданттә сааҭ алагалоуп ареспубликаҿы акоронавирустә инфекциа COVID-19 аламырҵәаразы.
Мшаԥымза 6 рзы Гәдоуҭатәи ахәышәтәырҭахь днаган Гагра ақалақь инхо ачымазары ҿкы здырбалаз ахаҵа. Хәажәкыра 29 рзы иара Москвантәи дааит.
Иара убас шәаԥхьар ҟалоит:
- Аҽыԥхьакра – уалԥшьоуп: Валери Бганба аԥсныжәлар рахь ааԥхьара ҟаиҵеит
-
Гагра араион аҿы аҭагылазаашьа ҷыда еиҳа ирӷәӷәахоит
