АҞӘА, мшаԥы 18 – Sputnik, Бадри Есиава. Аԥсны ахадас иалху Аслан Бжьаниа иҭоубашьҭаҵара ацеремониа мҩаԥысуеит аҳәаанырцәтәи асасцәа рыда ҳәа адырра ҟарҵеит атәыла ахада иусбарҭа апресс-маҵзураҿы.
"Акоронавирустә ҿкы аламырҵәаразы Аԥсныи уи ҩызарала иазыҟоу атәылақәеи рҿы иалагалоу акарантинтә ԥкрақәа инарыдҳәаланы, Аԥсны ахада имаҵура иахагылара иазку аҭоубашьҭаҵара Аконституциаҿы иарбоу ахаҿқәа алархәны имҩаԥгахоит ҳәа азыӡбоуп", – абас рҳәеит апресс-маҵзураҿы, иагьацырҵеит аҳәаанырцәтәи асасцәа шымаауа.
Ахада иусбарҭа апресс-маҵзураҿы иазгәарҭеит убасгьы аҭоубашьҭаҵара ацеремониа ишаҭаауа Жәлар реизара ахантәаҩи адепутатцәеи, Аконституциатә ӡбарҭеи Иреиҳаӡоу аӡбарҭеи аӡбаҩцәа, Алхратә комиссиа хада ахаҭарнакцәа, ааԥхьара имоуп Аԥсны иҟоу Аҭакзыԥхықәу, Азинмчра нагӡа змоу Урыстәылатәи Афедерациа ацҳаражәҳәаҩ Алексеи Двинианин.
Аинаугурациа ацеремониаан ҿыц иалху аҳәынҭқарра ахада аҭоуба шьҭеиҵоит, уи ашьҭахь ахада инапынҵақәа назыгӡо инапаҿы ииркуеит аҳәынҭқарратә мчра асимволқәа – агерб зну амҳәырқәа, абираҟ, алабашьа, аҳәа.
Аԥсны ахада иалхрақәа мҩаԥысит хәажәкыра 22 рзы. Алхрақәа рҟны аиааира игеит Аслан Бжьаниа, иара изы иарҭеит 56,5% абжьқәа. Арӡынба иоуит 35,42% бжьы, Ӡаԥшьба – 2,22%, зегьы ирҿагыланы – 1,75%.
Иара убас шәаԥхьар ҟалоит:
