АҞӘА, мшаԥы 21– Sputnik. Амшынеиқәа афлот арадиациатәи, ахимиатәи, абиологиатәи хьчара архәҭеи аԥснытәи асанитар-епидемиологиатә маҵзура аусзуҩцәеи мшаԥы 22 рзы ареспублика аобиектқәа рырзҩыдара иалагоит. Абри атәы Sputnik иазеиҭарҳәеит Аминистрцәа реилазаара апресс-маҵзураҿы.
Аусурақәа ирылагоит Атәылахьчара аминистрра агоспиталь хада аҟынтәи, нас – аџьармыкьа хадаҿы.
"Араионқәа рсанитартә ҳақьымцәа рацәажәара ашьҭахь иалкаахоит ауаа арцәа ахьнеиуа аобиектқәа. Аплан Атәылахьчара аминистррахь ирыҭахоит", - ҳәа лҳәоит ареспублика асанитартә ҳақьым хада Лиудмила Скорик.
"Сара Урыстәылатәи Афедерациа ҭабуп ҳәа расҳәар сҭахуп ацхырааразы. Иахьазы Аԥсны иҟам иахәҭоу атехника абри аус профессионалла амҩаԥгаразы", - лҳәоит лара.
Урыстәыла Аԥсныҟа аҟазауаа аанашьҭит аԥыза-министр Валери Бганба Михаил Мишустин иахь мшаԥы 13 рзы иҟаиҵаз аҳәара аҭакс.
Аминистрцәа реилазаара апресс-маҵзура аҳәамҭа ҟанаҵеит атехника ҷыда ареспубликахь ишаашьҭу атәылақәа рыҩба ртәылахьчаратә усбарҭақәа рыбжьара аусеицура аҳәаақәа ирҭагӡаны.
Иаашьҭу автомашьынақәа ирылахәуп аеразольтә рзҩыдара амобилтә комплексқәа АРС-14М, ареактив рныҟәага зықәгылоу амашьынақәа ТМС-65У.
Атехникеи аҟазауааи Гәдоуҭа иҟоу Урыстәылатәи арратә базаҿ итәеит.
Иара убас шәаԥхьар ҟалоит:
- Аԥсны аҭагылазаашьа ҷыда аҿҳәара иацҵам
