АҞӘА, жьҭаара 14 – Sputnik. Аԥсны ауаажәларратә палата ареспублика аенергетика ареформазы акомиссиа еиҿнакаауеит ҳәа арадио Sputnik иазеиҭалҳәеит апалата амаӡаныҟәгаҩ Гәыли Кьычԥҳа.
"Ауаажәларратә палата алахәылацәа изныкымкәа иалацәажәахьеит ари апроблема, аха уажәы иара еиҭацәырҵит "Амшынеиқәафымцамч" анапхгара ҿыц уи азҵаара ахьцәырнагаз азы. Ауаажәларраҿ агәҭынчымра ыҟоуп абри аусхк аҟны апроблема рацәа ахьцәырҵуаз", - ҳәа лҳәеит лара.
Кьычԥҳа лажәақәа рыла, акомиссиа иалахәхоит аекспертцәа, АУН "Амшынеиқәафымцамч" аусзуҩцәа, ауаажәларра рхаҭарнакцәа. Акомиссиа иахықәкыхадоу ауаажәларра алархәны асистема апроблемақәа рылацәажәароуп.
Ауаажәларратә палата амаӡаныҟәгаҩ иазгәалҭеит аиҳабырагьы асеиԥш иҟоу акомиссиа аԥҵара гәахәарыла ишрыдыркылаз.
Жьҭаара 8 рзы Урыстәыла афымцамч аминистрраҿы имҩаԥысит Аԥсны аекономика аминистр Кристина Озганԥҳа дызлахәыз аусутә еилацәажәара.
Аԥснытәи аган хықәкыс иамаз ЕгрыГЕС анаанкылахо аамҭазы ареспубликаҿы еиԥҟьарада афымцамч аиура алыршареи афымцамчсистема иааидкыланы атехникатә аудит алҵшәақәеи роуп.
Аиԥылара аихшьалақәа рыла урыстәылатәи аган аоператор дадгаланы афымцамч аашьҭразы атехникатә схема еиқәнаршәеит аремонттә усурақәа раан ареспубликаҿы иаҭаххо афымцамч амҽхак ашьақәыргыларазы.
Иара убас шәаԥхьар ҟалоит:
-
"Амшынеиқәафымцамч" аҿы ҭагалан-ааԥын иҟало афымцамч адефицит иалацәажәеит
-
Озганԥҳа амаининг иахҟьаны "Амшынеиқәафымцамч" иаиуз ацәыӡқәа дрылацәажәеит
