АҞӘА, абҵара 27 – Sputnik, Сариа Кәарцхьиаԥҳа. Аҟәа ақалақь асветофорқәа рыхәҭак уажәшьҭарнахыс афымцарцәараан еиԥҟьарада аус рулоит ҳәа Sputnik иазеиҭеиҳәеит Аҳәынҭқарратә автоинспекциа аиҳабы Баҭал Агрба.
Афымцалашара аамҭа-аамҭала арцәараан асветофорқәа аус руамызт, уи аныҟәараз ашәарҭарақәа аԥнаҵон.
Абҵара 27 азы Арӡынба имҩеи Леон имҩадуи реихысырҭаҿы асветофор еиԥҟьарада аус аура еиҿкаауп. Уаанӡа ари аҭыԥаҿы аамҭа-аамҭала алашара андырцәоз ААИ аусзуҩцәа гылан.
"Аилахәыра "Система" ацхыраара ҟанаҵеит. Уажәы Лакобеи-Леони амҩақәа реихысырҭаҿы асветофор шьақәҳаргылоит. Уи ззыҟаҳҵо ҳтәылауаа амҩатә ныҟәараан апроблемақәа рызцәырымҵырц ауп", - иҳәеит Агрба.
Хара имгакәа аҽа х-светофорк: Леон имҩаду, Ешба имҩа, Аҟәа ақалақь алаларҭа рҿы рҭыԥ иқәҵахоит.
"Арҭ аҭыԥқәа рҿы атранспорт рацәоуп. Урҭ рааигәа иҟоуп алашара азҭар зылшо аиҿкаарақә", -иҳәеит ААИ аиҳабы.
Агрба иазгәеиҭеит Аҳәынҭавтоинспекциа аусзуҩцәа есыҽны амҩатә ныҟәара хылаԥшра шарҭо.
Уаанӡа, асветофорқәа аус анырымуаз аусбарҭа аусзуҩцәа ишәарҭоу амҩахәҭақәа рҿы игыланы аныҟәара ҭышәындыртәалон.
