АҞӘА, ажьырныҳәа 7 - Sputnik. Аԥсны ахада Аслан Бжьаниа ҳтәылауаа, аиашахаҵаратә қьырсианцәа, ирыдиныҳәалеит Иаса Қьырса Иира амшныҳәа.
"Ҳаҭыр зқәу сыуаажәлар! Ишәыдысныҳәалоит Иаса Қьырса Иира амшныҳәа! Ҳара ҳажәлар иԥшьоу Қьырса ныҳәа зегь реиҳа бзиа ирбо, пату зқәырҵо қьырсиантә ныҳәоуп. Иара аԥсҭазаара ҿыц, аиҭарҿыцра иасимволуп", - ҳәа азгәаҭоуп адныҳәалара атекст аҟны.
Атәылаҿы иҟоу аепидемиологиатә ҭагылазаашьа ҳасаб азуны, ахада ауаажәлар рахь ааԥхьара ҟаиҵеит иалагалоу аԥкрақәа ртәы рхамшҭларц.
"Ишаԥу еиԥш, ари амш азы ҳара ҳаиҭанеиааиуеит, агәырӷьаратә еишәақәа ҳаргылоит. Аха адунеи зегьы иалаҵәаз апандемиа ҳзышьцылахьоу аԥсҭазаара аԥсахрақәа аланагалеит. Иҳадаҳкылаз асанитартә нормақәа излаҳадырҵо ала, аныҳәамшқәа раан аҳаиҭанеиааирақәа ирыгҳархароуп, ҳаиԥыларақәа ҳармаҷроуп. Аҳәара ҟасҵоит иахьагьы абри атәы шәхашәмыршҭырц", - ҳәа азгәеиҭеит Бжьаниа.
Аԥсны ахада Қьырса ныҳәа азгәазҭо атәылауаа зегьы ирзеиӷьеишьеит агәабзиара, аҭынчра, аизҳазыӷьара.
